Rusiyaya məxsus gəminin Almaniya hərbi helikopterinə xəbərdarlıq atəşi açdığı iddia edilib

Rusiyaya məxsus gəminin Baltik dənizində missiya uçuşu həyata keçirən Almaniya hərbi helikopterinə "xəbərdarlıq atəşi" açdığı iddia edilib.

Almaniyanın DPA xəbər agentliyinin məlumatına görə, Rusiyaya məxsus gəmi, kəşfiyyat missiyasını yerinə yetirən alman helikopterinə xəbərdarlıq atəşi açıb. Almaniya Müdafiə Nazirliyinin sözçüsü hadisə ilə bağlı şərh verməkdən imtina edib, sadəcə olaraq dənizdə və hava məkanında vaxtaşırı qayda pozuntularının baş verdiyini bildirib.

Almaniya Xarici İşlər Naziri Annalena Berbok daha əvvəl Baltik dənizində Rusiya gəmilərinin sanksiyaları pozduğuna tez-tez rast gəlinməsindən bəhs etmişdi. O, həmçinin Baltik dənizində boru kəmərləri və məlumat kabellərinə nəzarətin artırılacağına və kritik infrastrukturların patrul xidməti tərəfindən daha yaxşı qorunması gərəkdiyinə diqqət çəkib.