ÜST: ''Qəzza əhalisinin 6%-dən çoxu ya ölüb, ya da yaralanıb''
Son bir il ərzində İsrailin hücumlarına məruz qalan Qəzza əhalisinin 6%-dən çoxu ya ölüb, ya da yaralanıb
Son bir il ərzində İsrailin hücumlarına məruz qalan Qəzza əhalisinin 6%-dən çoxu ya ölüb, ya da yaralanıb.
Ümumdünya Səhiyyə Təşkilatının (ÜST) işğal altındakı Fələstin torpaqlarında fövqəladə hallar üzrə məsul şəxsi Ayadil Saparbekov BMT-nin Cenevrə Ofisinin həftəlik mətbuat konfransına onlayn qatılaraq açıqlamalar verib. O, bildirib: "Qəzzada əhalinin 6%-dən çoxu ya ölüb, ya da yaralanıb. Ən azı 10 min nəfər dağıntılar altında qalıb. Şəhərin səhiyyə sistemi təkrarlanan hücumlar və davam edən material, dərman, yanacaq və personal çatışmazlığından ciddi zərər görüb. 2023-cü ilin oktyabrından bu yana Qəzzada səhiyyə xidmətlərinə azı 516 hücum həyata keçirilib və bunlar 765 ölümə səbəb olub."
A.Saparbekov səhiyyə mərkəzlərinin yarısından azının fəaliyyət göstərdiyini, lakin onların da ehtiyaclara cavab verməkdə kifayət etmədiyini vurğulayıb. Hücumlar nəticəsində azı 24 090 nəfərin həyatını dəyişdirəcək dərəcədə yaralandığını qeyd edərək bu insanların reabilitasiya və xüsusi müalicə imkanları olmadığını bildirib.
Ayadil Saparbekov Qəzzada qidalanma çatışmazlığının başqa bir ciddi narahatlıq olduğunu və 2023-cü ilin yanvar ayından bu yana 4 337-si ağır kəskin çatışmazlıq olmaq şərtiylə, 20 241 uşağın qidalanma problemləri səbəbilə xəstəxanaya yerləşdirildiyini qeyd edib.
ÜST-nin oktyabr 2023-cü ildən bəri planlaşdırılan 214 missiyadan yalnız 44%-ni həyata keçirə bildiyini deyən A.Saparbekov xəstəxanalara yanacaq, dərman və tibbi avadanlıq çatdırdıqlarını söyləyib.
O, Qəzzada tərəfdaşları ilə birlikdə uşaq iflicinə qarşı peyvənd kampaniyasına başladığını xatırladaraq kampaniyanın ilk mərhələsində 560 mindən çox uşağa peyvənd vurulduğunu ifadə edərək deyib: "İsrail tərəfindən təkrarlanan təxliyə tələbləri və davam edən münaqişələr humanitar əməliyyatları ləngitməkdə davam edir. Biz təsirli bir atəşkəs, səhiyyə xidmətlərinin qorunması, səhiyyə müəssisələrinə təhlükəsiz çıxışın təmin edilməsi və bölgəyə davamlı yardımların çatdırılmasını tələb edirik."
