تورکیه تامانیدن افغانستان ده مکتب قوروب بیریلدی

تورک همکارلیک و هماهنگلیک (موافقلشتیریش) آژانسی باشقرمه سی (تیکا)، افغانستان نینگ مزار شریف شهریده اوقوچیلر اوچون زمانه‌وی معیارلرده باشلنغیچ مکتب قوردی.

تیکا مزار شریف دفتریدن بیریلگن بیاناتده، خالد بن ولید محله سیده جایلشگن محجوبه هروی باشلنغیچ مکتبی نینگ ۱۵۰۰ اوقوچیسی شو وقتگچه کرایه گه آلینگن اسکی بیر بناده تعلیم آلگنی و شو سببدن اوقوچیلرنینگ تعلیم لرینی زمانه‌وی معیارلرده داوام ایتتیره آلیشلری اوچون ینه یقین بیر منطقه ده ۸ صنف لیک ینگی باشلنغیچ مکتب قوریلگنی بیلدیریلدی.

بو دایره ده، مکتب نینگ اطراف تنظیملنیشی نینگ عملگه آشیریلگنی، باله لر اوچون اویین میدانی، سایه بانلر و اولتیریش اوریندیقلری اورنتیلگنی افاده ایتیلدی.

شونده‌ی قیلیب، مکتب نینگ احتیاجی بولگن کوپلب اسباب-اوسکنه لری نینگ هم تأمینلنگنی معلوم قیلیندی.

مکتب نینگ آچیلیش مراسمیگه تورکیه نینگ مزار شریف باش قونسلی قاسم قبان، بلخ والیسی اورینباسری الحاج مولوی نورالهادی ابو ادریس، تیکا مزار شریف دفتری مسئولی میکائیل تاشدیمیر، بلخ معارفی باشلیغی مفتی محمد شریف ابو عاصم عثمانی بیلن کوپ سانده اوقیتوچی، آته-آنه و اوقیووچی قتنشدی.

تورکیه نینگ مزار شریف باش قونسلی قبان صحبتیده، ایککی اولکه آره سیده گی اورتاق تاریخ و مدنیت قدریت لری نینگ اهمیتیگه تماس قیلدی.

تورکیه نینگ افغانستانگه قره تیلگن یاردم لری نینگ هیچ قنده ی حساب و کوتیش ایچیده قیلینمه گنینی بیلدیرگن قبان، "تورکیه و افغانستان اورتاق چیگره لرگه ایگه بولمه سه هم دوست ایککی قوشنی دولتدن هم یخشیراق مناسبت لرگه ایگه" دیدی.

تیکا مزار شریف دفتری مسئولی تاشدیمیر ایسه، دفترنینگ افغانستان نینگ شمالیده ۲۰۰۵ ییلدن بویان ۲۰۰ گه یقین پروژه نی حیاتگه تطبیق ایتگنینی و بونینگ ۶۰ دن آرتیغی نینگ تعلیم ساحه سیده ایکنلیگینی، آچیلیشی قیلینگن مکتب بیلن توپلم ۵۱ مکتب نی صفردن قوریب افغانستانلیک اوقوچیلرگه تحفه قیلگن لیکلرینی ایتدی.

افغانستانلیک مسئول لر ایسه مذکور یاردم اوچون تیکا و تورکیه گه منتدارچیلیک بیلدیردی.

بلخ والیسی اورینباسری ابو ادریس، "تورکیه دولتی و خلقی هر دایم افغانستان خلقی نینگ یانیده بولدی. فقط تعلیم ایمس هر ساحه ده قوللب-قوتله دی" دیدی.

مراسمدن کیین مکتب، ینگی بناسیده تعلیم فعالیت لرینی باشله دی.