بیرلشگن ملتلر تشکیلاتی انسان حقلری مخصوص وکیلی نینگ افغانستان گه کیریشی منع قیلیندی
بینیت 2022-ییل بیرلشگن ملتلر تشکیلاتی نینگ افغانستان بوییچه انسان حقلری مخصوص راپورچیسی ایتیب تعیینلنگن ایدی
افغانستان باشقرووی بیرلشگن ملتلر تشکیلاتی (بمت) نینگ افغانستان بوییچه انسان حقلری مخصوص راپورچیسی ریچارد بینیت نینگ مملکت گه کیریشینی منع قیلگن لیکلرینی اعلان قیلدی.
افغانستان اوتیش دوری حکومتی نینگ سوزچسی ذبیح الله مجاهد آلمان نینگ دویچه ویله کانالی گه بیرگن بیاناتیده، بیرلشگن ملتلر تشکیلاتی بمت قاله ویرسه کوپلب خلق‌ارا تشکیلاتلرنی «طرفلی» و «دشمن» دیب اته‌دی.
پایتخت کابلده اداره‌سی بولگن بیرلشگن ملتلر تشکیلاتی بمت نینگ افغانستان بوییچه یاردم باشقرمه‌سی (یوناما) وکیللری بیلن اوچره‌شوولر اوتکزگن لیکلرینی تاکیدله‌گن مجاهد، اولرگه ضروري آگاهلنتیریشلرنی بیرگن لیکلرینی و بیرلشگن ملتلر تشکیلاتی نینگ انسان حقلری بوییچه اعلان قیلگن راپورلرینی رد ایتگنلیکلرینی معلوم قیلدی.
مجاهد، بیرلشگن ملتلر تشکیلاتی بمت نینگ راپورچیسی بینیت گه ایشانمه‌یاتگن لیکلرینی و اونینگ افغانستانگه سفر قیلیشیگه رخصت بیریلمه‌گنینی افاده ایتیب بونینگ سببینی «افغانستانگه قرشی تبلیغ» ایتیب اته‌دی.
مجاهد، «جناب بینیت نینگ افغانستانگه کیریشی منع قیلینگن، چونکه او افغانستانگه قرشی تبلیغ آلیب باریش اوچون تعیینلنگن. او ایشانچلی ایمس. او افغانستانده ایمس و تبلیغ بیلن شغللنگنی اوچون کیریشگه رخصت یوق. کیچیک مسأله‌لرنی کتّه‌لشتیره‌یاتگن و باشقه تشکیلاتلرگه ناتوغری معلوماتلر بیره‌یاتگن ایدی. شو سببلی او افغانستانده منع قیلینگن،» دیدی.
بینیت 2022-ییل اپریل آییده بیرلشگن ملتلر تشکیلاتی بمت نینگ افغانستان بوییچه انسان حقلری مخصوص راپورچیسی ایتیب تعیینلنگن ایدی. بینیت افغانستانده‌گی انسان حقلری حالتی یوزه‌سیدن موجود حکومتنی تنقید قیلگن ایدی.
افغانستان رهبریتی خلق‌ارا همجمعیت نینگ، اینیقسه انسان حقلری بوییچه راپورلرینی «افغانستان حقیقتلریگه ضد» دیب حسابله‌ماقده.
