سفرنامه 3
برنامه
سلام تینگلاوچیلر!
مېن سېرا‌ن‌من. تورکيه‌نی کشف اېتیش اوچون باشله‌گن بو سیاحتیمده اوچره‌گن حکایه‌لر، اعتباریمنی تارتگن تفصیلاتلر و حس-تویغولریمنی سیزلر بیلن باهم کوره‌من. تورکيه‌ده‌گی سرگذشتلریم استانبولگه اوچیش پیتیده باشلندی. اوچاقده تنیشیب قالگن متقاعد اوقیتووچی گونش خانم بیلن قیلگن عجایب صحبتیمیز سیاحتیم نینگ عجایب باشلنیشی بولدی. پروازدن کېین استانبول هوا قونلغه سیده ایچگن ایسّیق چای دوامیده اوتگن صمیمي دقیقه‌لر بو سرگذشت نینگ بیرینچی اونوتیلمس خاطره‌لریدن بیریگه ایلندی.
یوکلریمیزنی آلگندن سونگ، تورکيه نینگ مابیل علاقه ترماقلریدن بیریدن سیم-کارت ساتیب آلدیم. سیم-کارت بیلن بیرگه انترنېت پاکتیم هم درحال فعاللشدی، شو طریقه علاقه بوییچه هېچ قنده‌ی معمام قالمه‌دی. گونش خانم بیلن تېلفون رقملریمیزنی المشیب، اوچره‌شیشگه کېلیشیب آلدیک. او مېنی اوییگه دعوت قیلیب، خواهله‌گنچه قالیشیم ممکنلیگینی ایتدی. مېن اونگه تکسیمده مهمانخانه‌ده جای بند قیلگنیمنی، اما بیر نېچه کون اونینگ مهمانی بولیشیم ممکنلیگینی ایتدیم. تورک مدنیتی حقیده اوندن کوپ نرسه اورگنیشیمنی حس قیلدیم. هوا قونلغه سیدن کېته‌یاتگنده گونش خانم بیلن خیرلشدیم و یالغیز اوزیم استانبولنی کشف اېتیشگه کیریشدیم. شهر مېنی کوته‌یاتگن اېدی، هر بیر بورچه‌گی ینگی سرگذشتلر وعده قیلردی.
استانبول سیاحتیم تکسیمده‌گی مهمانخانه‌مده دوام اېتردی. استانبول هوا قونلغه سی بیلن تکسیم آره‌سیده‌گی مصافه تخمیناً 40 کیلومتر اېکنلیگینی آلدیندن بیلیب آلگن اېدیم. بو مصافه‌نی باسیب اوتیش اوچون کوپلب ترانسپورت واسطه‌لری موجودلیگینی بیلیش مېنی تینچلنتیرگن اېدی. تکسیم نینگ استانبول نینگ یوره‌گی دېب اته‌لیشی و بو یېردن شهر نینگ هر بیر جاییگه آسان باریش ممکنلیگینی بیلیش مېنی هیجانگه سالدی. شونینگ اوچون مهمانخانه‌م نینگ جایلشووینی عیناً تکسیم دېب تنله‌گندیم. هوا قونلغه سیدن چیققندن سونگ هوا قونلغه سی اتوبسلریدن بیریگه چیقیب آلدیم. یول دوامیده شهر منظره‌سینی کوزه‌ترکن‌من، هیجانیم آرتیب باردی. تکسیم میدانیگه یېتیب کېلگنیمده، استانبول نینگ سِحریگه اسیر بولدیم. میدان نینگ جانلی فضاسی، کوچه‌لرده‌گی حرکت و هر بیر بورچکده حس قیلگن تاریخ مېنی اوزیگه تارتیب آلگن اېدی. بیر مدت میدانده ایلنگندن سونگ، چرچاقلریمنی اوتکزیش اوچون آلدیندن جای بند قیلگن مهمانخانه‌مگه یول آلدیم. مهمانخانه میداندن بیر نېچه دقیقه‌لیک مصافه‌ده اېدی. ایچکریگه کیرگنیمده ایلیق کوتیب آلیش بیلن قرشی آلیندیم. واستانبول نینگ آسایشته محیطی مېنی تینچلنتیریش اوچون یېترلی اېدی. راجستریشن ایشلری تېز آره‌ده یکونلندی و لیفتگه چیقیب، اتاقیم جایلشگن تورتینچی قبتگه کوتریلدیم. اتاق‌قه کیریشیم بیلن یوکیمنی بیر چېتگه قویدیم و بیرینچی ایشیم پنجره‌گه یوگوریش بولدی. پرده‌لرنی آچگنیمده کورگن منظره مېنی سِحرله‌دی. قرشیمده تکسیم نینگ حرکتلی فضاسی بیلن بوغازنینگ ساکن کوکلیگی مکمل اویغونلیکده یاییلگن اېدی. دېنگیز اوزاقلرده اینگیچگه چیزیق کبی کورینرکن، بلیقچی قوشلر آسمانده سوزیب یورردی. آقشام قویاشی استه-سېکین پسه‌یر، بوغاز یوزه‌سیگه طلا رنگ نور سېپردی. اوشه لحظه‌ده، منظره نینگ سِحری قرشیسیده نفسیم تیقیلیب قالدی. تکسیم نینگ انرژیسی بیلن بوغاز نینگ خاطرجمعلیگی نینگ اویغونلیگی، استانبول نینگ جاذبه‌دارلیگینی ایلک کونده‌ن حس قیلیشیمگه سبب بولدی. بو شهرده مېنی کوته‌یاتگن سرگذشتلرنی اویله‌گنیمده یوزیمده تبسم پیدا بولدی. استانبولده ینگی بیر سرگذشتگه قدم قویگن اېدیم و بو حلی باشلنیشی اېدی.
قیسقه مدت دَم آلگندن سونگ، استقلال کوچه‌سیگه سَیرگه چیقدیم. تراموای نینگ نوستالژیک آوازی، دوکانلردن کیله‌یاتگن کویلر و کوچه صنعتکارلری نینگ تأثیرچن اجرالری، بو بې تکرار تجربه‌نی تولدیرردی. هر بیر قدمده، استانبول نینگ قنچه‌لیک رنگ-برنگ و کوپ مدنیتلی شهر اېکنلیگینی چوقورراق حس قیلردیم. کېچکی ساعتلر یقینلشگنی سری کوچه ینه‌ده جانلنیب کېتدی. آدملر آره‌سیده، هر بورچکدن تورلی کویلر ینگره‌ب تورردی. بیر بورچکده دمبوره‌سی بیلن خلق قوشیقلرینی چله‌یاتگن صنعتکار، یانیدن اوته‌یاتگنلرنی قیسقه مدتگه اوز وطنلریگه آلیب کېتردی. بیرآز نریده یاش بیر گروه، گیتار و دوللری بیلن راک قوشیقلرینی چلیشه‌یاتگنده اطرافده‌گی عامه ذوق بیلن جور بولیشردی. باشقه بیر بورچکدن اېشیتیله‌یاتگن کلاسیک موسیقه صدالری اعتباریمنی تارتدی. اوچ کیشیلیک گروه، کمان و ویولونچېللری بیلن گویاکه کیچیک بیر کنسرت بېریب، کویلر بیلن کوچه‌ده سِحرلی بیر محیط یره‌تردی. اما اېنگ کوپ اعتباریمنی تارتگنی، کوچه اورته‌سیده تورگن بیر آدم بولدی. قولیده‌گی کتّه دولی بیلن ریتم توته‌‌رکن، آغیزیده چنگ آلیب قووناق کوی چلردی. باله‌لر خرسندچیلیک بیلن اونینگ اطرافیده رقصگه توشیشر، کتّه‌لر اېسه بو دقیقه‌نی تېلفون کامره‌لری بیلن ثبت قیلردی. استقلال کوچه‌سی، خودّی آچیق هوا کنسرت میدانی کبی اېدی. هر قدمده تورلی مدنیت و حس-تویغولر موسیقه بیلن جانلنگنیگه گواه بولردیم. اوشه لحظه‌ده، بو کوچه‌نی استانبول نینگ روحی دېب تعریفله‌دیم. صنعت و انسان اویغونلشگن بو سِحرلی محیط، خاطره‌مگه اونوتیلمس خاطره بولیب مُهرلنیب قالدی.
بو سیاحت مېن اوچون شونچه‌که بیر باشلنیش اېدی. قَیسی کوچه‌لرگه بوریلیشیم، قنده‌ی طعملرنی تا‌تیب کوریشیم و بو شهر مېنگه ینه نیمه‌لرنی تقدیم اېتیشینی کشف اېتیش اوچون طاقتسیزلنردیم. استانبول نینگ سِحری مېنی بوتونله‌ی اوره‌ب آلگن اېدی و هر بیر دقیقه‌سی اونوتیلمس بولیشیگه ایشانردیم. بیراق مشغول بیر کون نینگ آرتیدن چرچش‌نی یخشی‌گینه حس قیله باشله‌گندیم. "اېرته‌گه اېرته‌لب تېتیک حالده تکسیم میدانینی و بو کوچه‌نی کشف اېتیشگه چیقه‌من" دېب هوتلیم‌گه قَیتدیم و دَم آلیش اوچون اتاقیم‌گه کیریب کېتدیم. ینگی سرگذشتلرگه تیارلنیش اوچون یخشی اویقو شرط اېدی.
کېینگی بولیمده، تکسیم میدانی و استقلال کوچه‌سیده کورگنلریم، باشیمدن کېچیرگنلریم و حس قیلگنلریمنی سیزلر بیلن باهم کوریشده دوام اېته‌من. حاضرچه خیر!
