غزه اوچون آتشکیس گه ایریشیلدی
برنامه
غزه اوچون آتشکیس گه ایریشیلدی
اسرائیل نینگ 466 کوندن بېری دوام اېته‌یاتگن غزه منطقه‌سیگه قرشی آلیب باره‌یاتگن هجوملریده هلاک بولگنلر سانی 46 مینگ 707 نفرگه، یره‌لنگنلر سانی اېسه 110 مینگ 265 نفرگه یېتدی. هوا، قوروقلیک و دېنگیزدن محاصره آستیگه آلینگن، کوپلب حدودلری بې‌واسطه اسرائیل تامانیدن اشغال قیلینگن غزه‌ده بوتون دنیا نسل قیرغینی‌گه گواه بولدی، امریکا قوشمه ایالتلری و غرب مملکتلری نینگ قوللب-قوّتلشینی آلگن اسرائیلنی توخته‌تیش، افسوسکی، ممکن بولمه‌دی. نهایت اېندی غزه‌ده وقتینچه‌لیک تینچلیک اعلان قیلیندی. امریکا قوشمه ایالتلری نینگ سیلنگن دولت باشلیغی ترا‌مپ نینگ باسیمی و ایسته‌گن حربي نتیجه‌لریگه اېریشه آلمه‌گنی سبب نتانیاهو حکومتی وقتینچه‌لیک تینچلیک‌که راضی بولیشگه مجبور بولدی. جریان 19 جنوریدن باشلنه‌دی.
تشقی پولیتیکا بوییچه تیکشیرووچی و یازووچی جان اجون نینگ موضوع حقیده گی تحلیل یازووینی تقدیم ایته میز.
7 اکتوبردن بویان غزه منطقه‌سیگه قرشی دوام اېته‌یاتگن اسرائیل نینگ تیزیملی روشده آلیب باره‌یاتگن نسل قیرغینینی توخته‌تیش اوچون بیرینچی مرته حقیقي امید پیدا بولدی. قطر، مصر و امریکا قوشمه ایالتلری واسطه‌چیلیگیده حماس و اسرائیل اورته‌سیده دوام اېته‌یاتگن وقتینچه‌لیک تینچلیک مذاکره‌لریده یکوني باسقیچگه کېلیندی. تامانلر حلی بعضی مادّه‌لر بوییچه سونگگی مذاکره‌لرینی یکونله‌گنیدن سونگ، وقتینچه‌لیک تینچلیک بوییچه کېلیشووگه اېریشدی. ترا‌مپ امریکا قوشمه ایالتلری دولت رئیسلیک وظیفه‌سینی اوز ذمّه‌سیگه آلیشیدن آلدین منطقه‌ده تینچلیک کېلیشووی نینگ عملگه آشیریلیشیگه کتّه اهمیت بېرردی و شو نقطه‌ی نظردن نتانیاهوگه نتیجه‌لی طرزده باسیم اوتکزگنگه اوخشه‌یدی. البته حماسگه باغلیق حربي کوچلرنینگ غزه‌ده عملگه آشیرگن چیریکی طرزیده‌گی مقاومتی هم جوده ثمره‌لی بولدی. اسرائیل، تینچ اهالیلرگه قرشی کتّه قیرغینلر اوتکزه آلگن بولسه-ده، حماسگه جدّي ضرر یېتکزه آلمه‌دی. وقتینچه‌لیک تینچلیک مذاکره‌لری نینگ دوام اېتگن شو سونگگی هفته‌ده هم اسرائیل 20 دن آرتیق عسکریدن اَیریلدی، اوندن کوپراق عسکری یره‌لندی.
نتیجه‌ده اوزاق دوام اېتگن و اسرائیل اوچون هم هر تامانلمه ضررلی بولگن اوروشدن سونگ نتانیاهو تېگیشلی وقتینچه‌لیک تینچلیک کېلیشووینی قبول قیلیشگه مجبور بولدی. اما بو وضعیت، هضم قیلینیشی آسان جریان بولمه‌یدی. اسرائیلده‌گی اوته رادیکال اوروش کابینه‌سیده و حکومتیده جدّي بحرانلر پیدا بوله باشله‌دی. اوته اونگ قناتچی رادیکال صهونیست بېن گویر، بو کېلیشوونی تسلیم بولیش کېلیشووی صفتیده بهاله‌دی و قوللب-قوّتله‌مسلیگینی تأکیدلب، ایریم کابینه اعضالریگه هم چقیریق قیلدی. نتانیاهوگه قوللب-قوّتلش اېسه مخالفتدن کېلدی. اساسي مخالف کوچلرنینگ برچه‌سی، وقتینچه‌لیک تینچلیک جریانینی قوللب-قوّتلشلرینی اعلان قیلدی.
19 جنوریده باشلنه‌دیگن جریان نینگ هر بیری 42 کوندن عبارت 3 باسقیچدن تشکیل بولیشی کوتیلماقده. بیرینچی باسقیچ، حماس نینگ اسرائیللیک 33 اسیرنی تیریک یاکه اولیک حالده تاپشیریشینی اوز ایچیگه آله‌دی. بو باسقیچده اسرائیل اوردوسی غزه منطقه‌سیده کیرگن کوپلب حدودلردن چیقیب کېته‌دی و هر بیر اسرائیللیک اسیر عوضیگه 50 گه یقین فیلیستینلیک محبوس/اسیرنی آزاد قیله‌دی. کېلیشوو کوچگه کیرگندن 16-کونی باشلنه‌دیگن ایکّینچی باسقیچده غزه‌ده اوشلب توریلگن برچه اسرائیللیک اسیرلرنی آزاد قیلیش بوییچه کېنگ قمراولی کېلیشوو مذاکره‌لریگه اوتیله‌دی. کېلیشوونینگ اوچینچی و سونگگی باسقیچی اېسه غزه منطقه‌سینی قَیته تیکلشنی اوز ایچیگه آله‌دی.
غزه منطقه‌سیده وقتینچه‌لیک تینچلیک کېلیشووی کوچگه کیرگن بیرینچی کوندن باشلب اسرائیل اوردوسی، اهالی یشه یدیگن حدودلردن تشقریگه چیقیب کېته‌دی. اسرائیل نینگ اوچووچیسیز اوچیش واسطه‌لری نینگ (درون) پروازلری هم کونلیک 10 ساعت توخته‌یدی؛ اسیرلر المشووی نینگ بوله‌دیگن کونلریده اېسه درون‌لر نینگ پروازی 12 ساعت توخته‌یدی.
اسرائیل اوردوسی نینگ غزه منطقه‌سیدن چیقیب کېتیشی هم غزه‌نینگ شِمالی بیلن جَنوبی اورته‌سیده‌گی نېتزریم کوریدوری و غزه-مصر اورته‌سیده‌گی فیلادېلفي کوریدوری (صلاح الدین) شو جمله‌دن باسقیچمه-باسقیچ عملگه آشیریله‌دی. وقتینچه‌لیک تینچلیک کېلیشووی نینگ ایکّینچی باسقیچیده، اسرائیل اوردوسی هجوملری نینگ بوتونله‌ی توخته‌تیلیشی و غزه دن تولیق چیقیب کېتیشی اعلان قیلینه‌دی. کېینچه‌لیک غزه منطقه‌سیگه آچه‌دیگن چېگره ایشیکلری، یولاوچیلر اوتیشی و سودا اوتیشلریگه آچیله‌دی. وقتینچه‌لیک تینچلیک کېلیشووی کوچگه کیرگندن کېین درحال غزه‌گه یاردم یېتکزیلیشیگه یول آچیله‌دی و غزه ده آست توزیلمه‌سینی قَیته تیکلش، برق و سوو ترماقلرینی قوریش ایشلری باشلنه‌دی. کېینگی جریانده اېسه غزه ده ینگی تینچ اهالی باشقرووی تشکیل اېتیله‌دی.
تشقی پولیتیکا بوییچه تیکشیرووچی و یازووچی جان اجون نینگ موضوع حقیده گی تحلیل یازووینی تقدیم ایتدیک.
