تورکیه گه خاص بیر پیشلاق حقیده قیسقه معلومات
اوشبو پیشلاق تورکیه نینگ ایدیرنه ولایتی گه خاص
تورکيه نینگ غربگه آچیله دیگن دروازه سی ایدیرنه دن اوز اسمی نی کسب ایتگن, قوی، ایچکی و سیگیر سوتیدن تیارلنگن "ایدیرنه پیشلاغی"، شهر نینگ تجارت و صنایع اتاغی نینگ طلبی گه بناً میلادی 2004 - ییلده تورکيه نینگ ثبت قیلینگن جغرافی محصولاتی لیستی گه کیریتیلدی. تونجه، مریج، ارده و ایرگنه دریالری یقینیده گی طبيعی اندیمیک اوسیملیکلر بیلن آزیقلنه دیگن حیوانلرنینگ سوتی دن تیارله نه دیگن ایدیرنه پیشلاغی، اوزی گه خاص بیر طعمگه ایگه. سریقنی ایسله ته دیگن آق رنگگه ایگه ایدیرنه پیشلاغی نینگ قیماقنی ایسله ته دیگن بیر شکلی بار. شیرین، توزلی و بیر آز تُرش طعمی بولگن اوشبو پیشلاق نینگ ایشلب چیقریلیشیده فقط گینه سوت، طبيعی مایه و دینگیز توزی دن فایده له نیله دی. پیشلاق ایشلب چیقریشده ایشله تیله دیگن سوت بیرینچی دن 65 درجه ده پسترایز قیلینه دی و کیین ساووتیلیب، مایه لنیش جریانی اوتکزیله دی. مایه لنگن یریم ییتیلگن پیشلاق بوله‌کلری کیچیکراق بوله‌کلرگه بولینه دی و سووی نینگ چیقریلیشی اوچون سیقیله دی. پیشلاق نینگ یومشاقلیگی و قتتيقلیگی سیقیش بیلن اوزگره دی. سیقیلگن بوله‌کلر کیره‌کلی ییتیلیشگه ییتگنده، قالبلرگه بولینه دی و اوستیگه اورته توز سالینیب، 16 ساعت کوتتیریله دی. کیین قطی لر گه جایلشتیریلیب، اوستیگه ایشلنگن دینگیز توزی سالینه دی و ینه 24-30 ساعت کوتیش اوچون قالدیریله دی. سونگره 18 کیلوگرام لیک قطی لرگه تولدیریله دی. تولدیریشدن کیین قطی نینگ آغزی هوا آلمه سلیگی اوچون یاپیله دی و ساووق هوانی سقلاوچی دیپولرگه یوباریله دی. ساووق جایده هم کمیده 90 کون ییتیله دیگن پیشلاق استعمال قیلیشگه تیار حالگه کیله دی.
