اسرائيل‌نينگ ایران گه اویوشتیرگن هجومی و عاقبتی
برنامه
اسرائيل‌نينگ ایران گه اویوشتیرگن هجومی و عاقبتی
اسرائيل‌نينگ حماس رهبری اسماعيل هنيّه‌گه قرشی تهرانده عملگه آشيرگن سوىٴى‌قصدی و لبنانده حزب‌الله رهبرلريگه قرشی عملگه آشيرگن هجوملری بيلن تهدید کوچي سينلگن ايران، باليستيک راکېتلری بيلن اسرائيل گه جواب بېرگن ايدی. ايندی اسرائيل ايران گه قرشی جواب هجومينی عملگه آشيردی. کوتيلگنيدېک کتّه هجوم بولمسه‌ده، ايران‌نينگ هوا مدافعه تيزيملری و بعضی مهم حربی امرکزلری نشانگه آليندی. ايندی کوزلر ايرانده.
تشقی پولیتیکا بوییچه تیکشیرووچی و یازووچی جان اجون نینگ موضوع حقیده گی تحلیل یازووینی تقدیم ایته میز.
اسرائيل هفته آخريده ايرانگه قرشى بير مدّتدن بېری کوتيلگن جواب هجومينی عملگه آشيردی. عراق و سوريه هوا فضاسينی قوللنيب تخميناً ١٠٠ گه يقين اېف-١٦، اېف-١٥ و اېف-٣٥ مودلده‌گی جنگی اوچاقلر بيلن ٣ خيل تولقين حالتيده ايرانگه هجوم قيلدی. اوسنيت (OSNİT) منبعلريگه کوره، دستلبکی کېلگن تصويرلرده ايرانگه تېگيشلی هوا مدافعه تيزيملری و بعضی مهم راکېت همده درون قورغانلری اوريلگنی کورينه‌دی. ايران‌نينگ بيرگن بيانيگه کوره، هجومده ٥ کيشی حياتدن کوز يومدی. لېکين هجوم‌نينگ کوتيلگنيدېک کوچلی بولمه‌گنی و نسبتاً چېکلنگن بير حرکت بولگنينی ايتيش ممکن. بونده، البتّه، امریکا قوشمه ایالتلری نينگ اسرائيل گه باسيمی و عمليّاتده اسرائيل گه ياردم بېرمه‌گنی‌نينگ تأثيری کتّه. نهايت، ايران - اسرائيل آره‌سيده تخميناً ١٥٠٠ کيلومترليک مسافه بار و اسرائيل‌نينگ تخنيک امکان و قوّتی ممکن بولگن تنلشلرنی چېکله‌يدی. يېنه اسرائيل‌نينگ ايران‌نينگ نوکلر پروگرامّي گه اورتاق عمليات تکليفی امریکا قوشمه ایالتلری طرفيدن رد قيلينگن، ايران‌نينگ نفت صادرات آست قوریشی‌نينگ اوريليشی گه هم امریکا قوشمه ایالتلری توسيق بولدی. نتانياهو توليق خواهله‌گنينی آلالمه‌گن کورينه‌دی، شونينگ اوچون ايران‌نينگ هم قيلگن قتّيق بيانلريگه قره‌مسدن جواب بېريشی حاضرچه کوتيلمه‌يدی. بو حال قيسقه مدّتده دولتلر آره‌سيده‌گی کتّه اوروش احتماللرينی کمه‌يتيره‌ديگن عاملدير. لېکن اسرائيل هم غزّه، هم جنوبی لبنانده‌گی باسقينچيليکنی داوام اېتّيره‌يتگن حالده تينچ اهالی قتل‌عاملری هم داوام اېته‌دی. حماس و حزب‌الله ايسه چیریکی طرزده‌گی، آسيمېتريک قرشيليک کورستيشلری بيلن اسرائيل عسکرلريگه آغير يوقاتيشلر کېلتيرماقده‌لر. اسرائيل اوچون حاضرگی وضعيّتنی داوام اېتّيريش بونچه آغير يوقاتيشلر بېره‌يتگنده جوده آسان کورينمه‌يدی. يېنه فدايی عمللر بيلن اسرائيل وطنداشلری بولگن فلسطينليکلر دېيرلی هر کون اسرائيل ايچيده هجوملر قيلماقده‌لر، بو هم اسرائيلنی چرچته‌ديگن بير حال.
کورينيشيچه، نتانياهو و اوروش کابينه‌سی ممکن بولگن بير ترامپ دوری‌نی کوتماقده‌لر. امریکا قوشمه ایالتلری نينگ ترامپ رهبرليگيده ينه‌ده تجاوزکارراق شکلده اسرائيل گه ياردم بېريشی کوتيلماقده، لېکن توغريدن-توغری ايران بيلن اوروشگه کيريشی کوتيله‌ديگن نرسه اېمس. بونده‌ی بير وضعيّت‌نينگ امریکا قوشمه ایالتلری منفعتلريگه خذمت قيلمسليگی جوده آيدين، حاضرچه صهيونيستلر بيلن يخشی مناسبتده بوليب، سيلاولرده اوستونليک قولگه کيريتيشنی ايسته‌گن ترامپ‌نينگ اگر دولت رئیسی بوله آلسه، قنده‌ی بير سياست آلیب باره‌جگی ايسه نامعلوم.
تشقی پولیتیکا بوییچه تیکشیرووچی و یازووچی جان اجون نینگ موضوع حقیده گی تحلیل یازووینی تقدیم ایتدیک.
