ایران نینگ اسرائیل گه هجوم اویوشتیریشی منطقو‌ی اوروش گه ایلنه دی می؟

ایران نینگ اسرائیل گه هجوم اویوشتیریشی منطقو‌ی اوروش گه ایلنه دی می؟

ایران آخر "استراتیژیک صبر"نی بیر چتگه قوییب، اسرائیل نی بالیستیک راکتلر بیلن نشانگه آلدی. سونگی آیلرده اسرائیل نینگ تجاوزکار یانداشوویگه قرشی ایران عملاً جواب بیره آلمه گنده، قورقیتیش جهتیدن جدی ضررلر آلگن ایدی. بو حالت اسرائیل نینگ حزب الله نینگ رهبرلیک کدرلریگه قره تیب عملگه آشیرگن هجوملری بیلن بیرلشگنده، ایران نینگ جواب بیریشدن باشقه چاره سی قالمه دی - یا قورقیتیشینی قیته دن تیکله یدی یاکی چیکینه دی. ایران جواب بیریشنی تنله دی و تخمیناً ۲۰۰ بالیستیک راکت بیلن اسرائیل نی اوردی. البته، بو هجوم نینگ مهم نتیجه لری بوله دی.

تشقی پولیتیکا بوییچه تیکشیرووچی و یازووچی جان اجون نینگ موضوع حقیده گی تحلیل یازووینی تقدیم ایته میز.

اسرائیل نینگ اوزاق وقت دوام ایتگن تجاوزکار یانداشوویگه قرشی آخر ایران نینگ یخشی گینه مسخره قیلینه باشله گن "استراتیژیک صبری" توگه دی و اسرائیل گه قره تیلگن کینگ کولملی راکت هجومی عملگه آشیریلدی. ۲۰۰ گه یقین سوپرسونیک تیزلیگیده گی، اتموسفیره دن تشقری اوچیش قیله دیگن بالیستیک راکتلر بیلن اسرائیل ده گی عسکری مرکز لر نشانگه آلیندی. بعضی راکتلر امریکا قوشمه ایالتلری نینگ منطقه ده جایلشگن هوا مدافعه تیزیملری و اسرائیل نینگ Arrow 2-3 یوقاری ارتفاع هوا مدافعه تیزیملری تامانیدن توشیریلدی، لیکن ایران نینگ بالیستیک راکتلری عمومن نشانلرگه تیگگنی کوریلدی. ایلک کیلگن معلوماتلرگه کوره، F35 لر جایلشگن نیواتیم هوا مرکزی، تل نوف و نتیووت مرکز لری اوریلگن حالتده. بولر حقیده کورینیش تصدیقلری هم بار. لیکن حاضر حربی مرکزلرنینگ قنچه لیک ضرر کورگنی، F35 لر باشده بولیب، هر قنده ی اوچاق یوقاتووی یوز بیرگن-بیرمه گنی حاضر بیلینمه یدی. اسرائیل نینگ عسکری سانسور قوللنه یاتگنینی اونوتمسلیک کیره ک، ینه بعضی منبعلر اسرائیل نینگ ۵ تانکر اوچاق کوتریب، هجوم آلدیدن F35 لرنی هواده توتیب قوریقلش گه اورنگنی هم ادعا ایتیلدی. هجوم نینگ بیرگن ضررینی کیله دیگن کونلرده ماهواره تصویرلری بیلن تینیق راق آنگله ب آله میز، لیکن ایران نینگ بو سفر چین بیر شکلده اسرائیل نی نشانگه آلگنی جوده آچیق. اسرائیل  جدی بیر یالغان و ناتوغری تبلیغ قیلیب، جدی بیر ضرر آلمه گنینی ادعا ایته دی. بیر توردن پیسکولوژیک اوروش آلیب باره دی. لیکن بیر طرفدن هم جوده قتیق جواب بیره جکلرینی اورته گه قویه دیلر.

البته، ایران نینگ بو جسارتلی هجومی نینگ نتیجه لری بوله دی. اول نوبتده حزب الله باشده بولیب، مقاومت همکارلری نینگ اوز-اوزیگه اشانچی کیلدی و ایران نینگ آرقه لریده تورگنینی کوریب آلدیلر. بو، اینیقسه اسرائیل نینگ جنوبی لبنان نی ییردن باسیب آلیشگه اوروینه یاتگن بیر پیتده بولیشی جهتیدن جوده قیمتلی. حزب الله تیزراق قومنده بوغینینی ینگیدن قوروب، میدانده قرشیلیک کورستیشی کیره ک. ایککینچیدن، ایران قیته دن قورقیتووچیلیگینی قوریب آلدی، ایندی توپ اسرائیل نینگ میدانیده. ایلک بیرگن بیانات لریده جوابلری نینگ جوده قتیق بوله جگینی ایفاده ایتدیلر، احتمال، ایرانگه قره تیب بیر هوا هجومی عملگه آشیره دیلر، بو هم ایران نینگ ینه راکت آتیشلرینی کیلتیریب چیقره دی. شونده ی قیلیب، ایککی دولت توغریدن-توغری اوروشگه کیریشگن بوله دیلر. امریکا قوشمه ایالتلری نینگ بو ییرده نیمه قیله جگی هم مهم، اسرائیل  قیینله دیگن بیر وضعیت یوزه گه کیلسه، توغریدن-توغری اره لشه آله دی، بو هم البته کتته منطقه‌وی بیر اوروشنی کیلتیریب چیقره دی.

جوده مهم و تاریخی بیر بوریلیشده میز. اسرائیل نینگ غزه و لبنانده گی قتل عاملری توخته تیلمه سدن، منطقه ده تینچلیک نینگ اورنه تیلیشی ممکن ایمس.

تشقی پولیتیکا بوییچه تیکشیرووچی و یازووچی جان اجون نینگ موضوع حقیده گی تحلیل یازووینی تقدیم ایتدیک.