تورکیه گه خاص بیر پیشلاق حقیده قیسقه معلومات
اوشبو پیشلاق تورکیه نینگ آغری ولایتی گه خاص
تورکیه نینگ ایران چیگره سیده جایلشگن آغری ولایتی اینیقسه چارواچیلیک بیلن مشهور جای لردن بیری نی تشکیل ایتماقده. آغری ولایتی رهبریتی نینگ طلبی گه بناً میلادی 2024- ییلده تورکیه نینگ ثبت قیلینگن جغرافی محصولاتی لیستی گه کیریتیلگن "آغری تیری تولوم پیشلاغی" کوپینچه قوی نینگ سوتی دن تیارلنماقده. اساساً اوشبو ولایت گه خاص اوسیملیک لردن ییگن قوی سوتی دن فایده نیب تیارلنه دیگن بو پیشلاق نینگ تیارله نیشیده آزگینه بیر مقدار سیگیر سوتی دن هم استفاده ایتیله دی. خوددی شوو پیشلاق بیرآز توزلی، یریم یومشاق و جوده معطر بیر طعم گه ایگه. تولیق طبيعی مایه بیلن تیارلنه دیگن آغری تیری تولوم پیشلاغی اوچون بهار و یاز آیلریده ییلاولرده ایرکین اوتلب یورگن حیوانلردن ساغیلگن سوتلر 40 درجه گه ییتگونچه قَینه تیله دی. قَیناق سوتگه طبيعي مایه قۉشیلیب، بیر ساعتگه یقین کوتیله دی. "دیله مه" دیب اتله دیگن خام پیشلاق بوله کلری کۉپ بولینمه‌ی، "سوزه ک" دیب ناملنگن 2-3 کیلوگراملیک پخته دن تیارلنگن خریطه لر گه سالینه دی. اوشبو خریطه لر، پیشلاق نینگ سووی نینگ اجره لیشی اوچون 15-20 درجه ایسّیقلیکده تخمیناً 12 ساعتگه قدر کوتتیریله دی و بو جریانده خریطه ایلنتیریلیب توریله دی. بیرینچی سوزیش جریانی توگه گچ، خریطه لردن چیقریلگن پیشلاق بوله کلری 50 کیلوگراملیک قاپلر گه سالینیب، ینه 2-3 کونلیک بیر مدت بیلن سوزیش جریانی دوام اېتتیریله دی. سوزیلگن پیشلاق نخود کتته لیگیده ميده لنگچ، توزلنه دی و ینه پخته قاپلرگه سالینیب، بیر هفته دوامیده پیشیب ییتیلیشی اوچون کوتتیریله دی. کیین ایسه پیشلاق قوی تیریسیدن تیارلنگن تولومگه هوا قالمه یدیگن درجه ده زیچ بیر شکلده جایلنه دی. تیری تولوم ایچیده گی پیشلاق کمیده 4 آی دوامیده صفر درجه ایسّیقلیکده کوتتیریلیب، کیین استعمالچیگه ییتکزیله دی. آغری تیری تولوم پیشلاغی نینگ ساووق هواده 12 آی گه چه بوزیلمه‌ی سقله نیشی ممکن.
