Tojikiston prezidenti Imomali Rahmon Turkiya tashqi ishlar vazirini qabul qildi

Tojikiston prezidenti Imomali Rahmon Turkiya tashqi ishlar vaziri Mavlud Chavusho’g’li boshchiligidagi delegatsiyani qabul qildi.

Tojikiston Prezidenti Matbuot xizmati ma’lum qilishicha, uchrashuvda Turkiya-Tojikiston ko‘p qirrali munosabatlarini rivojlantirishning dolzarb masalalari ko‘rib chiqildi.

Davlat rahbari oliy darajadagi muntazam muloqotlar ikki mamlakat o‘rtasidagi do‘stlik rishtalari va strategik sheriklikni yanada mustahkamlash, o‘zaro manfaatli hamkorlikni kengaytirish va uni aniq mazmun bilan boyitishga xizmat qilayotganini mamnuniyat bilan qayd etdi.

Tashqi ishlar vaziri Mavlud Chavusho‘g‘li samimiy qabul uchun Tojikiston Prezidentiga minnatdorlik bildirdi  hamda Turkiya Prezidenti Rajap Tayyip Erdo’g‘anning salomi va samimiy tilaklarini yetkazdi.

Mavlud Chavusho’g’li suhbat chog’ida ertaga 30 mart kuni poytaxt Dushanbe shahrida bo’lib o’tadigan "Osiyoning qalbi - Istanbul jarayoni" tashqi ishlar vazirlarining 9-konferensiyasini tashkil qilganligi munosabati bilan prezident Imomali Rahmonga minnatdorlik bildirdi.

Savdo-iqtisodiy sohada hamkorlikni kengaytirish, jumladan, Turkiyaning yetakchi kompaniyalari ishtirokida Tojikistonda yangi investitsiya loyihalarini tayyorlash va uni amalga oshirish muhimligi qayd etildi.

Faol hududlararo muloqotni rivojlantirish, qo‘shma ta’lim va madaniy-gumanitar dasturlarni ilgari surishdan ikkala mamlakat ham manfaatdor ekani ta’kidlandi.

Shuningdek, xalqaro siyosat va mintaqaviy sheriklik masalalari yuzasidan fikr almashildi.

Mavlud Chavusho’g’li Turkiya Tojikiston bilan bo’lgan munosabatlariga katta ahamiyat berganligini ta’kidlab, “O’zaro savdo hajmimizni oshirishga va Tojikistonda Turkiyaning yetakchi kompaniyalari ishtirokida yangi investitsiya loyihalarini amalga oshirishiga qo’limizdan kelgancha yordam beramiz”,-dedi.

Turkiya tashqi ishlar vaziri Mavlud Chavusho’g’li Tojikiston sanoat va yangi texnologiyalar vaziri Sherali Kabir bilan ham uchrashdi.