Anqarada Muhammad al-Xorazmiy sharafiga haykal o‘rnatildi

Bugun 3-mart kuni O'zbekistonning Anqaradagi  elchixonasi tashabbusi bilan TURKSOY hamda Anqara shahar hokimiyati bilan birgalikda Muhammad al-Xorazmiy haykalining ochilish marosimi bo‘lib o‘tdi.

1594394
Anqarada Muhammad al-Xorazmiy sharafiga haykal o‘rnatildi

 

Anqarada buyuk matematik, algebra fanining asoschisi Muhammad al-Xorazmiy sharafiga haykal o‘rnatildi.

Bugun 3-mart kuni O'zbekistonning Anqaradagi  elchixonasi tashabbusi bilan Turkiy madaniyat xalqaro tashkiloti – TURKSOY hamda Anqara shahar hokimiyati bilan birgalikda "Xiva - turkiy dunyoning madaniyat poytaxti" xalqaro dasturi doirasida Turkiya poytaxtida Muhammad al-Xorazmiy haykalining ochilish marosimi bo‘lib o‘tdi, deb xabar bermoqda “Dunyo” AA muxbiri.

Tantanali ochilish marosimida Turkiyada amaliy tashrif bilan bo‘lib turgan Xorazm viloyati hokimi Farhod Ermonov, O'zbekiston elchisi Alisher Aʼzamxo‘jayev, Turkiy madaniyat xalqaro tashkiloti — TURKSOY bosh kotibi o‘rinbosari Bilol Chaqichi, Turkiya Buyuk Millat majlisidagi “Turkiya-O‘zbekiston” parlamentlararo do‘stlik guruhi raisi Osman Mesten, Anqara  shahar Kechio‘ren munitsipaliteti hokimi Turg‘ut Oltino‘q, Anqara gubernatorligining Kechio‘rendagi vakili Urgut Bulut,  shuningdek, mamlakat ilm-fan va madaniyat doiralari, OAV vakillari ishtirok etdi.

Al-Xorazmiy haykalining Anqara shahrida o‘rnatilishi O‘zbekiston Prezidenti Shavkat Mirziyoyev tashabbusi asosida TURKSOY tomonidan eʼlon qilingan "Xiva – turkiy dunyoning madaniy poytaxti" xalqaro dasturi doirasida amalga oshirildi.

Tadbirda  O‘zbekistonning Turkiyadagi elchisi Alisher Aʼzamxo‘jayev Muhammad Muso Al-Xorazmiy insoniyat tarixi va tamaddunida alohida o‘rin tutgan buyuk shaxslardan biri ekanini taʼkidladi. Xorazmiy merosi O‘zbekistonning, turkiy dunyoning bashariyat tarixida muhim o‘rin tutganini namoyish qilib turadi. Ushbu haykalning "Xiva – Turkiy dunyoning madaniyat poytaxti" xalqaro dasturi doirasida Anqarada ochilishi ham alohida ahamiyat kasb etmoqda.

Xorazmiy algebra fanining asoschisi hisoblanadi. “Algebra” so‘zi uning "Al-kitob al-muxtasar fi hisob al-jabr va al-muqobala" nomli risolasidan olingan. Uning arifmetikaga oid risolasi hind raqamlariga asoslangan bo‘lib, hozirgi kunda biz foydalanadigan o‘nlik pozitsion hisoblash tizimi va mazkur tizimdagi amallarning xalqaro ko‘lamda tarqalishiga sabab bo‘ldi. Olimning “al-Xorazmiy” nomi esa “algoritm” shaklida fanda abadiy o‘rnashib qoldi. Uning geografiyaga doir asari esa dunyoda shu yo‘nalishda o‘nlab kitoblarning yaratilishiga zamin yaratdi. Xorazmiyning “Zij”i G‘arb va Sharq mamlakatlarida astronomiyaning rivojlanish yo‘lini ko‘rsatib berdi.

Al-Xorazmiy sharafiga Turkiya paytaxtida haykal o‘rnatilishida ramziy maʼno bor. Chunki shahar qadimdan Yevropa va Osiyo o‘rtasidagi muhim savdo yo‘llari chorrahasida joylashgani tufayli bu yerda ilm-fan va madaniyat asrlar davomida rivojlanib kelgan.

Yodgorlik Anqara shahrining Kechio‘ren tumanidagi mashhur bog‘lardan biri - "Jo‘ka vodiysi" (Ihlamur Vadisi) hududida o‘rnatildi. Turkiya poytaxtidagi mazkur so‘lim bog‘ mahalliy aholi va mamlakat mehmonlarining sevimli maskani hisoblanadi. Bog‘ 2016-yilda qayta taʼmirlanibdan shakllantirilgan bo‘lib, 4,5 kilometrlik sunʼiy kanal atrofida joylashgan saylgoh sifatida sayqallangan.

Bog‘da, shuningdek, masjid, sport mashg‘ulotlari uchun maxsus maydonchalar va boshqa qulayliklar yaratilgan. Anqara munitsipaliteti va O‘zbekiston elchixonasi hamkorligida tashkil etilgan hamda o‘zbek diasporasi vakillari tomonidan yuritilayotgan “Farg‘ona” nomli qahvaxona ham shu yerda faoliyat ko‘rsatmoqda.

Ushbu maskanda ijtimoiy-ommaviy, madaniy tadbirlar tez-tez o‘tkazib turiladi.

Shu o‘rinda taʼkidlash kerakki, bugungi kunda Anqarada “O‘zbekiston” nomli 3 ta, “Toshkent” nomli 12 ta, “Samarqand” nomli 8 ta va “Buxoro” nomli 11 ta ko‘cha mavjud.

Kechio‘ren tumanidagi mashhur bog‘da qad rostlagan Muhammad al-Xorazmiy haykali esa O‘zbekistonning buyuk ilm-fani va merosini targ‘ib etuvchi navbatdagi ob'yektlardan biri bo‘ldi.

Muhammad al-Xorazmiy haykalining rasmiy ochilish marosimidan so‘ng O‘zbek milliy kiyimlari ko‘rgazmasi va "Mendirman Jaloliddin" filmining namoyishi bo‘lib o‘tdi.

 


Tanlangan kalimalar: #O'zbekiston , #Muhammad al-Xorazmiy , #Anqara

Aloqador xabarlar