O’zbekistonda 5 davlat fuqarolariga 10 kunlik vizasiz sayohat huquqi berildi
Shavkat Mirziyoyev tomonidan o’tgan oyda imzolangan “O‘zbekiston Respublikasida ichki va ziyorat turizmini yanada rivojlantirish chora-tadbirlari to‘g‘risida"gi farmon bugun, 1-martdan boshlab kuchga kirdi.
O’zbekistonda ziyorat turizmini rivojlantirish to’g’risidagi farmon kuchga kirdi.
Mamlakat prezidenti Shavkat Mirziyoyev tomonidan o’tgan oyda imzolangan “O‘zbekiston Respublikasida ichki va ziyorat turizmini yanada rivojlantirish chora-tadbirlari to‘g‘risida"gi Farmoniga muvofiq, 5 davlat fuqarolariga 10 kunlik vizasiz sayohat huquqi beriladi. Prezident farmoni bugun, 1-martdan boshlab kuchga kirdi.
2021-yil 1-martdan boshlab O‘zbekiston Respublikasi hududiga kirgan kundan e’tiboran 10 kunlik muddatga o‘z vatani yoki uchinchi mamlakatga uchish aviachiptasini taqdim qilgan quyidagi davlatlar fuqarolari uchun vizasiz rejim belgilandi:
— Bahrayn Qirolligi;
— Qatar Davlati;
— Quvayt Davlati;
— Ummon Sultonligi;
— Xitoy Xalq Respublikasi va uning tarkibiga kiruvchi Gonkong va Makao maxsus ma’muriy hududlari.
Shuningdek, xorijiy aviakompaniyalarning Indoneziya, Bangladesh va Malayziya mamlakatlaridan xorijiy turistlarning O‘zbekistonga sayohatlarini tashkil etishga qaratilgan hamda “Umra+” dasturi doirasidagi O‘zbekistonga aviaparvozlari, qo‘nish va uchish xavfsizligi qoidalaridan tashqari, to‘sqinliksiz amalga oshiriladi.
O’zbekiston hukumati avvalroq, turizmni rivojlantirish chora-tadbirlari to‘g‘risidagi qarorlari doirasida, 86 davlat vatandoshlariga 1 oydan 3 oygacha muddatga O’zbekistonga vizasiz sayohat qilish huquqini bergandi. Ushbu mamlakatlar orasida Turkiya ham bor.