ши җинпиң йавропаниң әйибләшлирини рәт қилди

түркийә авази радийоси хәвири: хитай ташқи ишлар министирлиқи байанат елан қилип, ши җинпиңниң фирансийә зийаритидә пирезидент макрон вә йавропа иттипақи комитети башлиқи урсула фондерлейен билән көрүшкәнликини билдүрди.

ши җинпиң көрүшүштә дунйаниң «давалғуш вә өзгириш» ниң йеңи басқучиға киргәнликини әскәртип, хитай билән йавропаниң икки муһим күч болуш сүпити билән бир-бирини шерик дәп билиши, дийалог вә һәмкарлиқта чиң туруши, өзара ишиниш вә истратегийәлик ортақ тонушни бәрпа қилип, дунйаниң тинчлиқи вә тәрәққийатиға төһпә қошуши керәкликини тәкитлиди.

у хитайниң йавропа иттипақи билән болған мунасивәтлиригә истратегийәлик вә узун муддәтлик нуқтидин қарайдиғанлиқини байан қилип, йавропа иттипақини хитайниң заманивилишишидики муһим шерик, мунасивәтлирини болса «хитай характери билән бүйүк дөләт дипломатийәси» ниң муһим өлчими дәп қарайдиғанлиқини қәйт қилди.

у хитайниң йеңи енергийә санаитиниң очуқ-ашкара риқабәт шараитлири астида илғар ишләпчиқириш иқтидарини бәрпа қилғанлиқини, буниң йәр шари характерлик еһтийаҗни ашуруп, пул пахаллиқи бесимини тәңпуңлаштурғанлиқини, шундақла килимат өзгириши вә йешил енергийә өзгиришигә төһпә қошқанлиқини илгири сүрди.

у мундақ деди:

«хитайниң аталмиш <ишләпчиқириш иқтидаридин ешип кетиши> дегән мәсилә, селиштурма әвзәллики вә йәршари характерлик тәләп нуқтисидин йоқ нәрсә.»

фирансийә пирезиденти макрон: «бүгүнки күндә дунйа нурғун мәсилиләргә дуч келиватиду, хәлқаралиқ вәзийәт һалқилиқ әһвалда турмақта. фирансийә вә йавропа иттипақи хитай билән болған мунасивәтлирини илгирикигә қариғанда техиму йахшилиши керәк. чүнки йавропаниң кәлгүси буниңға бағлиқ» деди.

йавропа иттипақи комитети башлиқи фондерлейен көрүшүштин кейин өткүзүлгән ахбарат елан қилиш йиғинида, хитайниң токлуқ қатнаш васитилири вә полат-төмүр санаитигә берилидиған толуқлиманиң, йавропа санаитигә еғир тәһдит елип келип, «йавропаниң санаәттин айрилиши» ни кәлтүрүп чиқиридиғанлиқини тәкитлиди.

у: «дунйа хитайниң ешинча мәһсулатлирини қобул қилалмайду» деди.