америка палатасиниң 88 әзаси исраилийәгә қилинған йардәмләргә қарши чиқти
америка палатасиниң 88 әзаси җо байдинни исраилийәгә берилгән йардәмни қайтидин көздин кәчүрүшкә чақириқ қилди.
түркийә авази радийоси хәвири: америка палатасида демократчилар партийәсиниң 88 әзаси пәләстин пуқралириға инсанпәрвәрлик йардиминиң йетип беришиға исраилийәниң қәстән тосқунлуқ қилғанлиқи тоғрисида ишәнчлик доклатларниң барлиқини билдүрүп, пирезидент җо байдинни исраилийәгә берилгән йардәмни қайтидин көздин кәчүрүшкә чақириқ қилди.
палата әзалиридин җәйсон кров вә кирис делузийо башчилиқидики бир түркүм демократчилар гурупписи байдинға ортақ имзалиқ мәктуп йоллиди.
88 палата әзаси имза қойған мәктупта: «исраилийә һөкүмитиниң ғәззәдә инсанпәрвәрлик йардимини қәстән тосуп қиливатқанлиқиға даир шундақла ғәззәдики урушни давамлаштуруш усулиға даир җиддий әндишилиримиз давамлашмақта. нетанйаһу һөкүмити уруш башланғандин буйан ғәззә райониға инсанпәрвәрлик йардәмләрниң киришини қаттиқ чәкләп кәлди» дейилди.
мәктупта американиң чәтәлләргә йардәм бериш қануниниң америка инсанпәрвәрлик йардиминиң тошулуши йаки тарқитилишини биваситә йаки васитилик чәклигән һәр қандақ дөләткә йардәм йаки қорал сетишни чәкләшниму өз ичигә алидиғанлиқи әскәртилди.
исраилийәниң бу мәсилидә чәкләш характерлиқ қилмишлири барлиқиға йетәрлик пакитларниң мәвҗутлиқи тәкитләнгән мәктупта йәнә, америка қоллиған инсанпәрвәрлик йардәмлиригә алақидар федератсийә қануниниң айақ асти қилинғанлиқи билдүрүлди.
мәктупта байдин һөкүмити исраилийәгә берилгән йардәмни қайта көздин кәчүрүшкә чақириқ қилинди.
