تۈركىيەنىڭ تۇنجى نېكروپول مۇزېيى ئانتاليادا خىزمەتكە كىرىشتۈرۈلدى

تۈركىيە ئاۋازى راديوسى خەۋىرى: مىنىستىر مەھمەت نۇرى ئەرسوي دەسلەپتە مۇزېينى زىيارەت قىلغاندىن كېيىن بايانات ئېلان قىلىپ، دۇنيانىڭ نۇرغۇن جايلىرىدا نېكروپول مۇزېيلىرى بارلىقىنى ئېيتتى.

ئەرسوي ئىسپانىيە، ئىتالىيە، ۋاتىكان ۋە بۇلغارىيەدىكى نېكروپول مۇزېيلىرىنى مىسال كۆرسىتىپ: «بۈگۈن بىز ئانتاليادىكى نېكروپول مۇزېيىنى ئاچتۇق. تۈركىيەنىڭ تۇنجى نېكروپول مۇزېيىدۇر. مىلادىدىن ئىلگىرىكى 3-ۋە 4-ئەسىرلەردىن تارتىپ، مىلادىدىن كېيىنكى 5-ئەسىرگىچە تۇتۇشىدىغان  قەبرىلەر كۆزگەزمە قىلىنىدۇ» دېدى.

مەدەنىيەت ۋە ساياھەت ئىشلىرى مىنىستىرلىقى تەرىپىدىن 2008-يىلى باشلانغان قۇتقۇزۇش ۋە قېزىپ تەكشۈرۈش جەريانىدا 866 قەبرىنىڭ تېپىلغانلىقىنى بىلدۈرگەن ئەرسوي، شۇچاغدىلا بۇ يەرگە نېكروپول مۇزېيى سېلىش قارار قىلىنغانلىقىنى ئېيتتى.

مەھمەت نۇرى ئەرسوي مۇزېيدا كۆرگەزمە زالىنىڭ بارلىقىنى بىلدۈرۈپ، فېستىۋال بويىچە سەنئەتكارلارنىڭ ئەسەرلىرىنىڭ كۆرگەزمە قىلىنىدىغانلىقىنى ئېيتتى.

مەھمەت نۇرى ئەرسوي مۇزېينىڭ ئانتاليانىڭ مەدەنىيەت بايلىقىغا تۆھپە قوشىدىغانلىقىنى بىلدۈردى.