ئەردوغان مەملىكەتلىك چېلىشىش ماھىرى رىزا كايائالپنى ئالاھىدە تەبرىكلىدى

تۈركىيە ئاۋازى رادىيوسى خەۋىرى: پولشانىڭ پايتەختى ۋارشاۋادا ئۆتكۈزۈلگەن ياۋروپا چېلىشىش لەۋھە تالىشىش مۇسابىقىسىنىڭ 6-كۈنىدە، مەملىكەتلىك چېلىشىش ماھىرىمىز رىزا كايائالپ گرېتسىيە-رىم ئۇسلۇبىدىكى 130 كىلوگراملىقلار ھەل قىلغۇچ مۇسابىقىسىدا گرۇزىيەلىك لاكوبى كاجىئا بىلەن مەيدانغا چۈشتى.

رىزا كايائالپ گرۇزىيەلىك رەقىبىنى 1 گە قارشى 3 نەتىجە بىلەن مەغلۇپ قىلىپ، كەسپىي ھاياتىدا ئۇدا  10- قېتىم ياۋروپا چېمپىيونلۇقىغا ئېرىشتى.

«ئەڭ كۆپ ياۋروپا چېمپىيونلۇقىغا ئېرىشكەن تۈرك تەنھەرىكەتچىسى» دېگەن نامغا ئىگە رىزا كايائالپ ئۆزىگە خاس رېكورتلارنى ياراتتى.

مەملىكەتلىك چېلىشىش ماھىرىمىز يەنە 4 قېتىم دۇنيا چېمپىيونلۇقىغىمۇ ئېرىشكەن بولۇپ، ئۇ ئولىمپىك ئىككىنچى ۋە ئۈچىنچىسى بولغان ئىدى.  

جۇمھۇر رەئىس رەجەپ تاييىپ ئەردوغان 10-قېتىم ياۋروپا چېمپىيونى بولغان مەملىكەتلىك چېلىشىش ماھىرىمىز رىزا كايائالپقا تېلېفون قىلىپ ئالاھىدە تەبرىكلىدى.

ئەردوغان مەملىكەتلىك چېلىشىش ماھىرىمىزنىڭ توكيو ئولىمپىك مۇسابىقىسىدىمۇ چېمپىيون بولۇشىنى كۈتىدىغانلىقىنى ئېيتتى.