әрдоған «камбириҗ җамәси» ниң ечилиш мурасимиға қатнашти
әнглийәниң камбириҗ шәһиридә бина қилинған вә йавропаниң тунҗи «муһит асраш дости» җамәси һесаблинидиған «камбирҗ җамәси» җумһур рәис рәҗәп таййип әрдоған иштирак қилған мурасим арқилиқ ишқа кириштүрүлди.
түркийә авази радийоси хәвири: әрдоған мурасимда қилған сөзидә, уда 10 йилдин көпрәк давамлашқан хизмәтниң мевиси болған «камбирҗ җамәси» ниң әнглийәдә йашаватқан түркләрниму өз ичигә алған пүткүл мусулманлар үчүн хәйрлик болушиға тиләкдашлиқ билдүрди, һәмдә уқуми «тинчлиқ» болған бир динниң симини «терроризм» ибариси билән бирликтә тилға елишниң хаталиқини тәкитләп мундақ деди: «әй ғәрб әллири! силәрниң терроризм билән исламни бирликтә тилға елиш һоңуқулар йоқ, әгәр бундақ қилишни давамлаштурсаңлар, бизму силәрни ләнәтләймиз. дәрвәқә, исламниң ичидин йаки мусулманларниң арисидин бирәр террорчи чиқти дәп исламниң шәнигә дағ тәккүзәлмәйсиләр, <исламий терроризм> дейәлмәйсиләр. шуни билишиңлар керәкки, нөвәттә мән җумһур рәислик вәзиписини өтәватқан түркийә даешқа қарши дунйа бойичә әң күчлүк күрәшни елип бериватқан дөләттур.»
мәсум инсанлар нишан қилинидиған һәр түрлүк зораванлиқ һәм һәрикәтни қәтий рәт қилиш вә буниңға қарши чиқиш мәсулийәтлириниң барлиқини қәйт қилған әрдоған, тарихий гуманларни бир чәткә қайрип қойуп, нәпрәт җинайәтлиригә қарши бирликтә күрәш қилишниң зөрүрлүкини, ғәрблик сийасий тәшкилатлар вә ахбарат васитилириниң мусулманлар йаки башқа динға етиқад қилидиғанларни чәткә қеқиш, әйибләшләрдин йирақ турушлири лазимлиқини тәкитлиди.
«камбириҗ җамәси» лайиһәсигә башлимчилиқ қилған дунйаға даңлиқ сәнәтчи йүсүф исламму мурасимда қилған сөзидә, наһайити хушиллинарлиқ бир хизмәтниң ишқа ашурулғанлиқини, буниңдин 42 йил илгири өзиниң лондонда йеңи селинған бир җамәгә берип мусулман болғанлиқини қәйт қилди.
игилинишичә, «камбирҗ җамәси» лайиһәсидә, ислам дининиң естетик сәнәт еңи, пәйғәмбәр әләйһиссаламниң йашаш тәрзини әкс әттүрүш вә тәбиәтни қоғдаш асас қилинған.
