تۈركىيەدىن 83 دۆلەتكە 125 مىليون دوللارلىق گۈل ئېكسپورت قىلىندى

تۈركىيە ئاۋازى رادىيوسى خەۋىرى: ئانتاليا، ئىزمىر،  ساكاريا، ئىسپارتا ۋە ھەر قايسى شەھەرلەردە ئۆستۈرۈلگەن گۈللەر چەت ئەللەرنىڭ زور تەلىپىنى قاندۇرماقتا. بۇلارنىڭ ئىچىدە ئانتاليادىن چەت ئەللەرگە ئېكسپورت قىلىنغان گۈللەر %65 نى ئىگىلەيدۇ.

زىننەت ئۆسۈملۈك مەھسۇلاتلىرى ئېكسپورتچىلار جەمئىيىتىنىڭ رەئىسى ئىسمائىل يىلماز يۇقۇم مەزگىلىدىمۇ مەزكۇر ساھەنىڭ تېز تەرەققىي قىلىۋاتقانلىقىنى بىلدۈردى.

ئۇ بۇ يىللىق (2021) ئېكسپورت نىشانىنى 115 مىليون دوللار قىلىپ بېكىتكەنلىكلىرىنى ئەسكەرتىپ: «بۈگۈنگىچە، بىز 125 مىليون دوللار ئەتراپىدا ئېكسپورت قىلدۇق. مېنىڭچە يىل ئاخىرىغىچە 150 مىليون دوللاردىن ئېشىپ كېتىمىز. بۇ ئېكسپورتىمىزنىڭ %55-50 ئاشقانلىقىدىن دېرەك بېرىدۇ» دېدى.

ئۇ بولۇپمۇ ياۋروپادا زور قىزىقىشنىڭ بارلىقىنى، 83 دۆلەتكە گۈل ئەۋەتكەنلىكلىرىنى، بۇنىڭ ئىچىدە، گوللاندىيە، ئەنگىلىيە، گېرمانىيە، ئۆزبېكىستان ، رۇمېنىيە ۋە بۇلغارىيە قاتارلىق دۆلەتلەرنىڭ ئالدىنقى قاتاردا تۇرىدىغانلىقىنى ئېيتتى.

ئۇ يۇقۇم مەزگىلىدە گۈل ئېكسپورت قىلىنغان دۆلەتلەرنىڭ سانىدا ۋە گۈل ئېكسپورت مىقدارىدا كۆپىيىش بولغانلىقىنى قەيت قىلدى.