әрдоған дунйа ислам алимлири музакирә йиғинида сөз қилди

түркийә авази радийоси хәвири: җумһур рәис рәҗәп таййип әрдоған истанбулда өткүзүлгән дунйа ислам алимлири музакирә йиғининиң ечилиш мурасимиға қатнашти вә сөз қилди.

у: «өзини <әркинлик дөлити> дәп ативалғанлар, исираилийәниң мәнпәәтигә кәлгәндә дәрру фашизмниң түгминигә су қуйуп бериватиду. биз рак кесилигә гириптар болған бимарларни өз ичигә алған 400 дин артуқ ғәззәлик бимар вә йаридарларни дөлитимизниң һәр қайси дохтурханилирида давалаватимиз. виҗданға игә дөләт вә җәмийәтләрдин башқа, дунйа системисиниң җоҗайинлиридин исираилийәгә бесим қилишини күтүш, пүтүнләй биһудиликтур. биз исираилийәниң виҗдан авазини антисемитизм калтики билән уҗуқтурушиға рухсәт қилмаймиз» деди.

у ғәззәдә исираилийәниң һуҗумлири башланған 7-өктәбир (2023) инсанийәт тарихидики әң вәһшийанә қәтлиамлардин бириниң йүз берватқанлиқини әскәртип: «исираилийә бигунаһ қан төкүшни давамлаштуруватиду. 15 миң кичик бала вәһшийләрчә өлтүрүлди. 35 миң пәләстинлиқ қериндишимиз шеһит қилинди. 2 милйон киши йурт-маканлиридин қечишқа мәҗбур болди. 7-өктәбирдин илгириму үсти очуқ түрмә болған ғәззә 219 күндин буйан гитлер германийәсидә көрүлгәндәк қирғин қилип йоқитиш лагериға айланди» деди.

у сөзини мундақ давамлаштурди:

«барлиқ дөләтләрни балдуррақ пәләстин дөлитини етирап қилишқа чақиримән. һамас ғәззәдә узун муддәтлик уруш тохтитиш йолида муһим қәдәмни басти.  исираилийә баш министири нетанйаһу һөкүмити болса, рәфаһтики бигунаһ кишиләргә һуҗум қилиш билән җаваб бәрди.»

у ахирида, афғанистанниң бағлан вилайитидә йүз бәргән кәлкүн апитидә җенидин айрилғанларға аллаһтин тәһмәт тиләш билән сөзини ахирлаштурди.

афғанистанниң бағлан вилайитидә йүз бәргән кәлкүндә 300 дин артуқ кишиниң җенидин айрилғанлиқи билдүрүлди.