әрдоған: п к к ни йоқитиш ирақ үчүнму пайдилиқ

түркийә авази радийоси хәвири: җумһур рәис әрдоған ирақ зийаритидин қайтиветип, айропиландики мухбирларниң соаллириға җаваб бәрди.

әрдоған түнүгүнки ирақ зийарити җәрйанида, йеқиндин буйан күчийиватқан икки дөләт мунасивитиниң музакирә қилинғанлиқини тәкитләп, болупму террорлуққа қарши туруш, сода, қатнаш, енергийә вә килимат өзгиришиниң тәсири қатарлиқ мәсилиләрниң муһакимә вә музакирә қилинғанлиқини билдүрди.

ирақниң йеқинда п к к террорлуқ тәшкилатини «чәкләнгән тәшкилат» дәп җакарлиғанлиқини әскәрткән әрдоған: «биз дөлитимизниң буниңдин рази икәнликини билдүрдуқ» деди.

әнқәрәниң терроризмға қарши күрәшни ирақ билән бирликтә елип беришни халайдиғанлиқини тәкитлигән әрдоған: «п к к / й п г/ п й д террорлуқ тәшкилати ирақниңму муқимлиқи, тәрәққийати вә тинчлиқиға тәһдит. бу тәһдитни йоқитиш ирақниң мәнпәәтигиму уйғун. мән уларниң бу һәқиқәтни көрүп йетип, бу мәсилини түгитиш ирадисини намайан қилидиғанлиқиға ишинимән. ирақниң тәрәққийат тәсәввури вә хәлқара мәбләғниң бихәтәрлики үчүн, бу террорлуқ орәклириниң түзлиниши вә ирақ үчүн алдин мөлчәрлигили болидиған кәлгүсиниң бәрпа қилиниши толиму муһим» деди.

террорлуқни ундақ йаки мундақ усул билән йоқитиидиғанлиқлирини тәкитлигән әрдоған: «бизниң бу мәсилидики ирадимиз қәтий. мәйданни һәргизму террор вә террорлуқ тәшкилатлири билән биллә маңған вә террорлуқ тәшкилатлирини пичка қилип ишлитидиғанларға ташлап бәрмәймиз» дегәнләрни сөзлиригә илавә қилди.