йашар гүләр террорлуқни мәнбәсидин йоқитиш истратегийәси һәққидә муһим сөз қилди
дөләт мудапиә министири йашар гүләр терорлуқни мәнбәсидин йоқитиш истратегийәси билән үзлүксиз вә әтраплиқ һәрикәтләрни елип берип, терорлуқ тәшкилатлириға еғир зәрбиләрни бәргәнликини ейтти.
түркийә авази радийоси хәвири: министир йашар гүләр дөләт мудапиә министирлиқида өткүзүлгән «18-март шеһитләрни хатириләш күни вә чанаққәлә деңиз зәпириниң 109 – хатирә йили паалийәтлиригә қатнашти.
министир йашар гүләр сөзидә, тарихтики әң чоң ғәлбиләрниң бирси болған чанаққәлә зәпириниң мустәқиллиқ урушиниңму башламчиси болуш алаһидиликигә игә икәнликини ейтти.
йашар гүләр чанаққәләдики күрәш роһидин елинған илһам билән җумһурийәтниң иккинчи әсридә түркийәни техиму күчлүк вә парлақ кәлгүсигә йүзләндүрүш мәқситидә, тиришчанлиқларниң давам қиливатқанлиқини тәкитләп: «пүтүн дунйада йирикчиликләр әвҗ алған бир мәзгилдә түркийә болуш сүпити билән қара деңиздин африқағичә вә оттура шәрқтин кавказғичә тинчлиқ вә муқимлиқни һөкүмран қилиш үчүн күчлүк тиришчанлиқ көрситиватимиз» деди.
министир гуләр түркийә қораллиқ қисимлириниң биртәрәптә чегра бихәтәрликини мудапиә қилса, дөләт ичидә вә чегра сиртида терорлуққа қарши күрәштә зор утуқларни қолға кәлтүргәнликини әскәртип йәнә мундақ деди:
«илгири елип берилған қаратмилиқи чәклик вә вақитлиқ һәрикәтләрниң орниға, бүгүнки күндә биз терорлуқ тәшкилатлирини мәнбәсидә йоқитиш истратегийәмиз билән үзлүксиз вә әтраплиқ һәрикәтләрни елип берип, терорлуқ тәшкилатлириға еғир зәрбиләрни бәрмәктимиз. әгәр һазир у йәрләрдә болмиған болсақ, терорлуқ тәшкилатиниң дөлитимиз вә миллитимизгә қарши һуҗумлири дөләт ичидә илгирикигә охшаш давамлашқан болатти вә һазирқи муқимлиқ ишқа ашмайтти. һеч киши гуманланмаслиқи керәкки, терорлуққа қарши күришимиз, тинчлиқимиз вә бихәтәрликимиз үчүн қәтий ирадә билән үзүлмәй давамлишиду»
министир йашар гуләр терорлуққа қарши күрәш билән тәң бирла вақитта йәнә, көк вәтәндики һәқ – һоқуқ, мәнпәәтлириниңму қәтийлик билән қоғдиливатқанлиқини тәкитлиди.
