әрдоған: америка уруш тохтитиш чақириқлириға қулақ йопурувалмаслиқи керәк

түркийә авази радийоси хәвири: җумһур рәис рәҗәп таййип әрдоған венгирийә зийаритини ахирлаштуруп, мәмликәткә қайтиш сәпиридә айропиланда муһим байанатларни елан қилди.

у барлиқ учришишларда 7-өктәбир (2023) дин буйан ғәззәдә йүз бериватқан инсаний тирагедийәләрниң муһим күнтәртип маддиси болғанлиқини әскәртип, венгирийә зийаритидә узун муддәтлик уруш тохтитишни әмәлгә ашурушта вә инсанпәрвәрлик йардәмлириниң тосалғусиз йәткүзүлүшини капаләткә игә қилишта, қилиш мумкинчилики болған хизмәтләрни өзара музакирә қилғанлиқлирини қәйт қилди.

у исираилийә қирғинчилиқни давамлаштуруватқан бир вақитта, пүткүл дунйада ғәззәдә уруш тохтитиш чақириқлириниң күчәйгәнликини тәкитләп, мундақ деди:

«әмди америка бу чақириқларға қулақ йопурувелиштин ваз кечиши керәк. исираилийә пәқәт ғәззәнила бомбардиман қилмайватиду, бәлки пүткүл инсанийәтни бомбардиман қиливатиду. тарих буларға җимҗит қарап турғанларни сотқа тартиду вә тарихниң қараңғулуқиға мәһкум қилиду. тәхтини бикар қилиш, нетанйаһуни қутқузалмайду. аҗизларниң һәқ-һоқуқини қануний җәһәттин сүрүштә қилимиз. нетанйаһунила әмәс, бу қирғинчилиқта қоли болған һәммә киши қанун алдида өткүзгән уруш җинайәтлириниң һесабини бериду. исираилийәдиму нетанйаһу һөкүмитигә қарши күчлүк авазлар чиқишқа башлиди. әсирләрниң исираилийә тәрипидин өлтүрүлүши наразилиқларни техиму йуқири көтүрди.»

у украина-русийә уруши үстидиму тохталди вә ашлиқ каридориниң қайтидин ечилиши керәкликини тәкитлиди.

у: «пат йеқинда русийә пирезиденти владимир путин билән көрүшүп, бир амалларни қилип ашлиқ каридорини ачайли дәймән. иншааллаһ униңдин иҗабий җаваб елип, йолимизни давамлаштуримиз» деди.