хақан фидан ғәрб дөләтлириниң сүкүт қилип түрувелишини қаттиқ тәнқид қилди

түркийә авази радйоси хәвири: ташқи ишлар министири хақан фидан боснийә-гертсеговина ташқи ишлар министири әлмәдин конакович билән ташқи ишлар министирлиқидики учришшидин кейин чақирилған қошма ахбарат елан қилиш йиғинида сөз қилди.

хақан фидан мәнсәпдеши билән «исраилийәниң ғәззәдики вәһшийликиниму музакирә қилғанлиқлирини» тилға елип, «ғәззәдики қанунсиз муһасирә вә инсан қелипидин чиққан һуҗумларниң һазирму давамлишиши номуссизлиқтур. әң қорқунучлуқ болғини, исраилийәниң нопузи астидики ғәрб дөләтлириниң ғәззәдики вәһшийликкә қарита пүтүнләй сүкүт қилип түрувелишидур» деди.

хақан фидан ғәрб дунйасини «әхлақ қаришини қоғдашқа вә ғәззәдики очуқ-ашкара садир қилиниватқан инсанийәткә хилап җинайәтләргә шерик болмаслиққа» чақирип, «исраилийәниң ғәззәдики қанунсизлиқи вә пуқраларни коллектип һуҗум нишани қилишиға қарита сүкүттә туруши, дунйаниң башқа җайлиридиму қанунниң дәпсәндә қилинишиға йешил чирағ йеқип бериш билән охшаш» деди.

хақан фидан түркийәниң «бу қирғинчилиқни тохтитиш вә бу вәһшийликни түгитиш үчүн күчлүк тиришчанлиқ көрситиватқанлиқини» тәкитлиди.