فىدان: شىمالىي قىبرىسنىڭ ئېتىراپ قىلىنىشى ئۈچۈن ئىزچىل خىزمەت ئىشلەيمىز
دىپلوماتىيە مىنىستىرى خاقان فىدان شىمالىي قىبرىس تۈرك جۇمھۇرىيىتى ۋە ھەق – ھوقۇقلىرىنىڭ پۈتكۈل دۇنيا ئەللىرى تەرىپىدىن ئېتىراپ قىلىنىشى ئۈچۈن پۈتۈن كۈچلىرى بىلەن خىزمەت ئىشلەيدىغانلىقلىرىنى ئېيتتى.
تۈركىيە ئاۋازى رادىيوسى خەۋىرى: تاشقى ئىشلار مىنىستىرى خاقان فىدان شىمالىي قىبرىس تۈرك جۇمھۇرىيىتى مەتبۇئاتلىرىغا بايانات ئېلان قىلدى.
فىدان باياناتىدا، شىمالىي قىبرىس تۈرك جۇمھۇرىيىتىنىڭ پۈتكۈل دۇنيا ئەللىرى تەرىپىدىن ئېتىراپ قىلىنىشىنى قولغا كەلتۈرۈش يولىدا خىزمەت ئىشلىنىۋاتقانلىقىنى، شىمالىي قىبرىس تۈرك جۇمھۇرىيىتىنىڭ مەۋجۇدىيىتى ۋە ئۈزلۈكسىز داۋاملىشىشى ئۈچۈن تۈركىيە جۇمھۇرىيىتى بولۇش سۈپىتى بىلەن، قوللىرىدىن كېلىشىچە خىزمەت ئىشلەشنى داۋاملاشتۇرىدىغانلىقلىرىنى تەكىتلەپ مۇنداق دېدى:
«تۈركىيە بولۇش سۈپىتىمىز بىلەن، شىمالىي قىبرىس تۈرك جۇمھۇرىيىتىدىكى تۈركلەرنىڭ ھەق – ھوقۇقلىرى، تۈرك دۆلىتىنىڭ پۈتكۈل دۇنيا ئەللىرى تەرىپىدىن ئېتىراپ قىلىنىشىنى قولغا كەلتۈرۈش ئۈچۈن پۈتۈن كۈچىمىز بىلەن خىزمەت ئىشلەشنى داۋاملاشتۇرىمىز. دەرۋەقە، قىبرىس تۈركلىرىنىڭ شان – شەرەپلىك ھالدا ياشىشى، گۈللەپ ياشنىشى ۋە پاراۋانلىقى ئۈچۈن ھەر دائىم خىزمەت ئىشلەۋاتىمىز. بۇ ئۇزۇن ھەم جاپالىق يول، ئەمما بىز بۇ يولدا ھېرىپ – چارچاشنى ئۇنتۇپ، داۋاملىق ئالغا ئىلگىرىلەيمىز، جۇمھۇر رەئىسىمىز رەجەپ تاييىپ ئەردوغان ئېيتقاندەك، بىز يولىمىزنى قەتئىي داۋاملاشتۇرىمىز.»
