фаһрәттин алтун мусулман дөләтләрниң  учур – алақә министирлирини һәмкарлишишқа чақирди

түркийә авази радйоси хәвири: җумһур рәислик учур - алақә идарисиниң байанатиға асасланғанда, ислам һәмкарлиқ тәшкилати 12-нөвәтлик учур – алақә министирлири конферансиниң нөвәтчи рәислик вәписини өтәватқан фаһрәттин алтун тәшкилатқа әза дөләтләрниң учур – алақә ишлири министирлириға, пәләстингә қаритилған һуҗум вә (ғәрбниң) тәтүр тәшвиқат паалийәтлири һәққидә мәктуп йоллиған.

фаһрәттин алтун мәктубида, исраилийәниң пәләстин хәлқигә қаратқан һәрбий һуҗумини түркийәниң әйиблигәнликини вә техиму көп кишиниң җенидин айрилишниң алдини елиш үчүн шәртсиз уруш тохтитиш чақириқида болғанлиқини әскәртти.

фаһрәттин алтун хәлқара ахбарат органлириниң һуҗумға мунасивәтлик кишилик һоқуқ дәпсәндичиликлирини ақлаш урунушлирини қәтий рәт қилидиғанлиқини тәкитләп: «һәқиқәт хүнүкләштүрүлүп, кәң тарқалған тәтүр тәшвиқатлар аммини қаймуқтуруватқан бир вақитта, биз ислам һәмкарлиқ тәшкилатиға әза дөләтләрниң учур - алақа ишлири министирлирини пәләстинликләргә қарши (айал вә кичик бала) айрип олтурмастин қилиниватқан һуҗумларға шундақла тәтүр тәшвиқатларға қарши туруш күришимизни күчәйтишкә чақиримиз. пәләстиндики инсанийәткә хилап паҗиәгә сәл қарашқа болмайду. бизниң ортақ тиришчанлиқимиз бу мәсилигә хәлқара җәмийәтниң диққитини тарталишимиз үчүн интайин муһим» деди.

йемәк-ичмәк, су вә токтин мәһрум қалдурулған пәләстин хәлқиниң коллектип җазалинишиниң хәлқара қанунға хилап икәнликини тәкитлигән фаһрәттин алтун: «хәлқара җәмийәт чоқум көз алдимизда йүз бериватқан вәһшийликкә қарши һәрикәткә өтүши керәк. һуҗумлар сәвәбидин миңлиған кичик балилар җан бәрди. кичик балиларниң кәлгүсигә болған үмиди йәр билән йәксан қилинди» деди.

фаһрәттин алтун әқәллий кишилик һоқуқниң дәпсәндә қилинишиға йол қоймаслиқ керәкликини тәкитләп: «дунйа хәлқара кишилик һоқуқниң һәммә адәмгә нисбәтән тәң күчкә игә икәнликини унтуп қалмаслиқи керәк» деди.

фаһрәттин алтун оттура узун муддәтлик тинчлиқ орнитишниң бирдинбир йоли һамас-исраилийә тоқунушини һәл қилиш икәнликини тәкитләп, «бигунаһ пуқраларниң өлтүрүлүшигә қарши авазимизни әң күчлүк чиқиришимиз вә ғәззәдики қирғинчилиқни тохтитиш үчүн һәмкарлишип һәрикәт қилишимиз керәк» деди.

фаһрәттин алтун пүткүл инсанийәтни вә хәлқара җәмийәтни һәрикәткә келип, ғәззәдики мисли көрүлмигән вәһшийликни тохтитишқа чақирди.