йәрликайа түркийәниң йеқинда йолға қойулидиған тәртипсиз көчмәнләр сийасити һәққидә мәлумат бәрди

түркийә авази радийоси хәвири: түркийә җумһурийити ички ишлар министири әли йәрликайа пайтәхт әнқәрәдә мухбирларниң соаллириға җаваб бәрди.

у өзи вәзипә өтәшкә башлиған ийун ейиниң бешидин тартип 22 – сентәбиргичә болған җәрйанда, 97 миң 363 қанунсиз көчмәнниң қолға чүшүрүлгәнликини вә уларниң 42 миң 875 ниң чеградин қоғлап чиқирилғанлиқини тәкитлиди.

тәртипсиз көчмәнләрниң асаслиқи афғанистан, пакистан, өзбекистан вә иран чеграсидин кәлгәнликигә ишарәт қилған министир йәрликайа, өзлириниң көчмә көчмән тәкшүрүш түзүмини истанбулда йолға қойуп, мувәппәқийәт қазанғанлиқлирини байан қилип: «1 – өктәбирдә бурса, адана, измир вә әнқәрәдә көчмә көчмән тәкшүрүш түзүмини йолға қойимиз. 1 – нойабирда бу машиниларниң санини 153 кә йәткүзүп, 30 чоң шәһәрлик һөкүмәт тәвәликидә бирла вақитта йолға қойимиз, 1 – декабирда түркийә миқйасида йолға қойулиду» дегәнләрни қәйт қилди.

гиретсийә көчмәнләр вә панаһлиниш ишлири министири вә булғарийә ички ишлар министири билән өткән һәптә чегра бихәтәрлики вә қанунсиз көчмәнләргә қарши туруш мәсилиси тоғрисида телефонда сөһбәтләшкәнликини билдүргән министир йәрликайа, булғарийә ички ишлар министири калин стойанофниң 10- өктәбир түркийәгә келидиғанлиқини, гиретсийә көчмәнләр вә панаһлиниш ишлири министири димитрис керидисниң зийарәт вақтиниң техи бекитилмигәнликини ейтти.