уралоғлу: алҗирийә түркийәниң «африқа дәрвазиси» һесаблиниду
түркийә қатнаш вә ул әслиһә министири абдулқадир уралоғлу алҗирийәниң түркийәниң африқаға ечилидиған дәрвазиси, түркийәниңму бу дөләт үчүн оттура асийаға ечилидиған дәрвазиси икәнликини ейтти.
түркийә авази радийоси хәвири: қатнаш вә ул әслиһә министири абдулқадир уралоғлу 21 – сентәбир күни башланған вә уда икки күн давамлашқан алҗирийә зийарити һәққидә бәргән байанатида, бу дөләткә қилған зийаритини алҗирийәниң аммиви ишлар, су вә асаслиқ муәссәсәләр министири лаһдар раһруһниң саһибханлиқида ишқа ашурғанлиқини, шундақла алҗирийә қатнаш министири йүсүф шарфа, белиқчилиқ вә деңиз мәһсулатлири министири әһмәд бәдани, алҗирийә почта вә хәвәрлишиш ишлири министири керим биби тирки билән айрим - айрим көрүшкәнликини қәйт қилди.
уралоғлу учришишлириниң наһайити мувәппәқийәтлик өткәнликини, алҗирийәдә түркийә ширкәтлириниң барлиқини әскәртти, алҗирийә даирилири билән ул әслиһә саһәлиригә мәбләғ селиш, деңиз-окйан қурулмилири, белиқчилиқ, авийатсийә вә хәвәрлишиш қатарлиқ саһәләрдә ортақ қәдәмләрни ташлаш һәққидә музакирә елип барғанлиқлирини тәкитлиди.
у түркийәниң бейҗиңдин башлинип лондонға тутишидиған оттура каридорға җайлашқан муһим дөләт икәнликини, оттура каридорда, шундақла фав портидин хабур вә овакөй чегра еғизиғичә созулидиған тәрәққийат йолида муһим хизмәтләрниң ишлинишкә башлинидиғанлиқини қәйт қилди, алҗирийәниң африқадики истратегийәлик орниниң муһимлиқини тәкитләп мундақ деди:
«бу нуқтидин елип ейтқанда, алҗирийә түркийәниң африқаға ечилидиған дәрвазиси, түркийәму бу дөләт үчүн оттура асийаға, түрк җумһурийәтлиригә ечилидиған муһим дәрвазиси һесаблиниду. шу вәҗидин, деңиз содимизниму техиму тәрәққий қилдурушимиз керәк.»
алҗирийә аммиви ишлар, су вә асаслиқ муәссәсәләр министири раһруһ министир уралоғлу билән бирликтә түркийә-алҗирийә сода-санаәтчиләр мунбири йиғиниға қатнашқанлиқини, бу йиғинниң, шундақла уралоғлу билән елип берилған учришишларниң наһайити мувәппәқийәтлик өткәнликини ейтти.
раһруһ түркийә ширкәтлириниң алҗирийәдики әң чоң чәт әллик мәбләғ салғучи ширкәтләр икәнликини, түркийәниң алҗирийәгә селиватқан селинмилириниң техиму ашидиғанлиқини байан қилди.
