әрдоған будапештта бир қатар дөләтләрниң рәһбәрлири билән көрүшти

түркийә авази радийоси хәвири: җумһур рәис рәҗәп таййип әрдоған виктор орбанниң тәклипи билән йетип барған пайтәхт будапешттики кармелита монастирида өткүзүлгән көрүшүштә, түркийә-венгирийә мунасивәтлиридин башқа, түркийәниң йавропа иттипақиға әза болуш мусаписи вә дунйа күнтәртипи мәсилилирини музакирә қилди.

рәҗәп таййип әрдоған зийарити рамкисида, будапештта өзбекистан пирезиденти шәвкәт мирзийайев вә униң һәмраһлиқидики һәйәт билән көрүшти.

көрүшүшләрдә, түркийә билән өзбекистан мунасивәтлиридин башқа, район вә дунйа мәсилилири музакирә қилинди.

рәҗәп таййип әрдоған будапештта сербийә пирезиденти александар вуҗиҗ биләнму көрүшти.

көрүшүштә, түркийә-сербийә мунасивәтлири вә район мәсилилири музакирә қилинди.

җумһур рәис рәҗәп таййип әрдоған балқанларниң тинчлиқ вә муқимлиқ нуқтисидин сербийәни һалқилиқ дөләт сүпитидә көридиғанлиқлирини әскәртип, түркийә-сербийә мунасивәтлириниң тарихидики әң йуқири сәвийәгә йәткәнликини билдүрди.

у будапештта башланған 2023-йиллиқ дунйа йеник атлитка мусабқисиниң әрләр 100 метирға йүгрәш һәл қилғуч мусабиқисини көрди. у сәһнидә әзәрбәйҗан пирезиденти илһам әлийев вә қатар әмири шәйх тәмим бин һамед алсани билән сөһбәтләшти.

у венгирийә пирезиденти каталин новак билән көрүшкәндә, венгирийәниң дөләт байримини тәбриклиди.

көрүшүштә, икки дөләт мунасивәтлири, районлуқ вә хәлқаралиқ мәсилиләр музакирә қилинди.

у боснийә-гертсеговина пирезидентлиқ кеңишиниң әзаси зәлика җвижйановиҗ вә сербийә пирезиденти милорад додик биләнму көрүшти.

боснийә-гертсеговина пирезидентлиқ кеңишиниң әзаси зәлика җвижйановиҗ билән болған көрүшүштә, икки тәрәп мунасивәтлири, һазирқи һәмкарлиқларни техиму чоңқурлаштуруш үчүн ташлаш мумкин болған қәдәмләр музакирә қилинди.

рәҗәп таййип әрдоған будапешттики учришишлирини ахирлаштурғандин кейин, түркийәгә қайтти.

у венгирийә зийарити тоғрисида иҗтимаий таратқу адресида һәмбәһрлигән учурида: «бүгүн истратегийәлик шерикимиз һәмдә натодики иттипақдишимиз венгирийәниң қурулуш йили вә дунйа йеник атлитка мусабиқилириниң башлиниш мунасивити билән будапештта болдуқ. зийарәтлиримиздә, венгирийә пирезиденти вә баш министириға меһман болған башқа дөләтләрниң башлиқлири биләнму бир йәргә җәм болдуқ» деди.

у венгирийә билән чоңқур вә сағлам достлуқ риштилириға тайанған кәң даирилик мунасивәтләргә игә икәнликлирини тәкитләп, мундақ деди:

«мунасивәтлиримизниң һәр саһәсидә муһим илгириләшләрни қолға кәлтүрүватимиз. икки дөләтниң сода омумий соммиси 2022-йили 3.5 милйард доллар сәвийәсигә йетип, тарихтики әң йуқири сәвийәгә йәтти. бирликтә тиришиш арқилиқ бу рәқәмни қисқа вақит ичидә 6 милйард долларға йәткүзидиғанлиқимизға ишинимиз. мунасивәтлиримизни барлиқ тәрәплири билән көздин кәчүрүш вә мунасивәтлиримизни техиму илгири сүрүш мәқситидә ташлайдиған қәдәмләр музакирә қилинған зийаритимизниң хәйрилик болушини тиләймән» деди.