әрдоған: хәлқимизниң параванлиқини йахшилаш үчүн хизмәт ишлидуқ
дөлитимиз (түркийә җумһурийити) җумһур рәиси рәҗәп таййип әрдоған 21 йиллиқ һакимийәт йүргүзүш мәзгилидә түркийә хәлқиниң һәр бир саһәдики параванлиқини йахшилайдиған муһим хизмәтләрни ишлигәнликлирини ейтти.
түркийә авази радийоси хәвири: җумһур рәис рәҗәп таййип әрдоған түнүгүн пайтәхт әнқәрәдики җумһур рәислик мәһкимисидә чақирилған ички кабинет йиғинидин кейин елан қилған байанатида, түркийәниң алдида ечиливатқан тарихий пурсәт пәнҗирисини кәң ечиш ирадилириниң қәтийликини тәкитләп мундақ деди: «һөкүмәт болуш сүпитимиз билән, қутлуқ сәпиримизни давамлаштурушқа қолайлиқ йаритип беридиған енергийә һәм ишәнчкә игимиз. дөләт болуш сүпитимиз билән, буниңға йетәрлик дәриҗидә нурғун ул әслиһәлиримиз вә йошурун күчимиз бар.»
һакимийәт йүргүзгән мәзгиллиридә түркийәни әң зор тәрәққийатларға ериштүргәнликлирини вә демократийәдә бөсүш һасил қилғанлиқлирини әскәрткән җумһур рәис әрдоған миллий киримни һәр йили оттура һесаб билән% 5.5 ашуруп, 1 тирилйон лираға йәткүзгәнликлирини тәкитләп мундақ деди: «32 милйон кишини ишқа орунлаштурдуқ. сийасий вәсийликтин терроризмғичә, һәрбий - сийасий өзгириштин иқтисадий тузақларғичә биз дуч кәлгән мәсилиләр буниң сиртида, әлвәттә. пүткүл хәлқимизниң һәр бир саһәдики параванлиқини йахшилайдиған муһим хизмәтләрни ишлидуқ.»
әрдоған түркийә бүйүк милләт мәҗлиси (парламенти) ниң ечилиши билән бирликтә техиму әркин асасий қанун түзүш хизмити ишләшкә башлайдиғанлиқлирини әскәртип мундақ деди: «7-айдики експорт санлиқ мәлуматлири һәрикәтләндүргүч күчимизниң давамлиқ ешиватқанлиқидин дерәк бериду. дәрвәқә, 7-айда експортимиз 20 милйард 93 милйон долларға йәтти. шуниң билән, експортта 7-айда әң йүксәк сәвийәгә йәттуқ.»
җумһур рәис әрдоған оттура мәзгиллик пирограмминиң сода дунйаси вә ишчилар ойушмилириниң вәкиллири билән бирликтә тәййарлиниватқанлиқини, бу пирограммини сентәбир ейида елан қилидиғанлиқлирини қәйт қилди.
