әрдоған мудапиә санаити йәрмәнкисиниң йепилиш мурасимида сөз қилди
җумһур рәис рәҗәп таййип әрдоған: «биз мудапиә санаитидә бөсүш һасил қилидиған, бу саһәниң йөнилишини бәлгиләйдиған илғар техникиға игә йеңи мәһсулатлар билән пүтүн дунйаниң һозуриға чиқимиз» деди.
түркийә авази радийоси хәвири: җумһур рәис әрдоған истанбулда өткүзүлгән 16 – нөвәтлик «IDEF-23» хәлқара мудапиә санаити йәрмәнкисиниң йепилиш мурасимида сөз қилип: «биз мудапиә санаити саһәсидә бесип өткән мусапә, бизниң һәм мәнбәмиз, һәм илһам мәнбәсимиз, һәмдә бизниң немиләрни қилалайдиғанлиқиниң бешарити» деди.
мудапиә санаитидә мәлум басқучқа кәлгән түрләрниң сүритини тезлитидиғанлиқлирини билдүргән әрдоған: «биз бу саһәниң еһтийаҗини бекитип, өзгичә һәл қилиш чарилирини оттуриға қойимиз» деди.
җумһур рәис әрдоған: «2002- йили мудапиә саһәсидә пәқәт 57 ширкитимиз паалийәт елип баратти, нөвәттә бу санниң қанчә икәнликини биләмсиләр? 2500 » дегәнләрни қәйт қилди.
мудапиә санаитидики иқтидар вә қабилийәтләрни дост вә қериндаш дөләтләр билән ортақлишишни давамлаштуридиғанлиқлириға ишарәт қилған әрдоған: «бихәтәрликкә охшаш һайат - маматлиқ бир мәсилиниң дөләтләр арисида тәһдит вә бесим амили қилип ишлитилиши тоғра әмәс» деди.
җумһур рәис әрдоған: «биз кәлгүсидики нишанимизни експортни ашуруп, мудапиә санаити иқтисад системисини күчәйтиш дәп бекиттуқ» дегәнләрни сөзлиригә илавә қилди.