қуртулмуш әзәрбәйҗан баш министири билән көрүшти
түркийә бүйүк милләт мәҗлиси (парламенти) рәиси нуман қуртулмуш әзәрбәйҗан баш министири әли әсәдов билән көрүшти.
түркийә авази радийоси хәвири: түркийә бүйүк милләт мәҗлиси рәиси нуман қуртулмуш дөләт ишлири зийаритидә болуш үчүн йетип барған әзәрбәйҗан ташқи ишлар министирлиқи бинасида, һәмраһлиқидики түркийә бүйүк милләт мәҗлиси һәйити билән бирликтә әзәрбәйҗан баш министири әли әсәдов билән бир йәргә җәм болди.
қуртулмуш бу йәрдә қилған сөзидә, мундақ деди: «түркийә болуш сүпитимиз билән, биз сәпиримизни қалған йәрдин давамлаштуримиз. бизниңму, әзәрбәйҗанниңму қолдин берип қойғудәк һеч вақти йоқ, һәр икки дөләт бу сәпәрни қәтий давамлаштуруши керәк.»
әзәрбәйҗан билән түркийә оттурисидики мунасивәтләрниң сәвийәсиниң наһайити йуқири икәнликини, шуңа буни хәлқаралиқ ениқлима билән ипадилигили болмайдиғанлиқини әскәрткән қуртулмуш мундақ дәп көрсәтти: «һәм әзәрбәйҗан һәм түркийә үчүн тарихий һәрикәтләндүргүч күч һасил қилғанлиқимизға ишинимән, бундақ мувәппәқийәтни асан қолға кәлтүргили болмайду, әлвәттә.»
қуртулмуш дунйаниң һәрқайси җайлириниң дегүдәк чоң тоқунуш вә җиддийчилик дәвриниң башланғучида туруватқанлиқини әскәртип мундақ деди: «бу күрәш илгири бәзи районлар биләнла чәклинәтти, әмма биз һазир дунйаниң һәрқайси җайлиридики чоң күчләрниң күришигә шаһит болуватимиз. бу күрәш әң көп давамлишиватқан җай түркийә дәл мәркизигә җайлашқан җуғрапийәдур. кавказ райони, балқан райони, қарадеңиз, ақдеңиз, шәрқий ақдеңизму дәл бу җуғрапийәгә җайлашқан. бу җуғрапийәниң тинчлиқи вә хатирҗәмликигә капаләтлик қилиш бизниң әң муһим ишимиздур.»
қуртулмуш 6 – феврал күни қаһраманмарашни мәркәз қилған түркийәниң 11 вилайитидә йүз бәргән йәр тәврәш апитидин кейин намайан қилған қериндашлиқ муһир - муһәббити вә һәмкарлиқ асасидики иш бирлики үчүн әзәрбәйҗан дөлити вә хәлқигә рәһмәт ейтти.»
