түркийә: йавропа иттипақи тәртипсиз көчмәнләр мәсилисидә бир пүтүн усул қоллиниши керәк

түркийә авази радийоси хәвири: түркийә тунҗи қетим өз үстигә алған хәлқара көчмәнләр сийасәтлири тәрәққийат мәркизий иҗраийә һәйитиниң нөвәтчи рәислики вәзиписи даирисидә, белгийә пайтәхти бирйусселдики түркийә сода - санаәтчиләр вә карханичилар бирләшмисиниң ишханисида илмий муһакимә йиғини өткүзүлди.

түркийәниң йавропа иттипақида турушлуқ даимий вәкили баш әлчи фаруқ қаймақчи билән түркийә көчмәнләр идарисиниң башлиқи доктор саваш үнлүниң саһибханлиқида өткүзүлгән бу илмий муһакимә йиғиниға, йавропа иттипақи комитетиниң кеңийиш ишлириға мәсул әзаси оливер варһелйи, йавропа парламенти әзалири, йавропа иттипақи органлири, аммиви тәшкилатларниң вәкиллири, иқтисадий тәрәққийат фонди җәмийитиниң рәиси айһан зәйтиноғлу вә хәлқара көчмәнләр сийасәтлири тәрәққийат мәркизиниң баш директори майкел спинделеггер қатарлиқлар қатнашти.

қаймақчи тәртипсиз көчмәнләр мәсилисиниң дунйа вә йавропаниң ортақ синиқи икәнликини, көчмәнләрни башқурушниң бир пүтүн һәл қилиш чарисини тәқәзза қилидиғанлиқини тәкитлиди.

у көчмәнләр кәлгән дөләтләр, көчмәнләр өтидиған дөләтләр вә көчмәнләр беришни нишан қилидиған дөләтләр үчүн адил мәсулийәт вә йүкни тәң үстигә елиш истратегийәси түзүшниң зөрүрлүкини қәйт қилди, шундақла һәмкарлиқ тиришчанлиқиниң йавропа иттипақи чегралирида әмәс, бәлки йавропаниң шәрқий вә шәрқий җәнубий чеграсини тәшкил қилидиған түркийә-иран-ирақ-сүрийә чеграсидин башлиниши керәкликини тәкитлиди.

қаймақчи һазирға қәдәр 560 миңдәк көчмәнниң өз ихтийарлиқи билән сүрийәгә қайтқанлиқини әскәртти, һәмдә йавропа иттипақи билән түркийә йолға қойуватқан көчмәнләрниң өз ихтийарлиқида бихәтәр вә иззәт-һөрмити билән өз дөлитигә қайтишиға капаләтлик қилиш сийаситиниң 18-март келишиминиңму тәқәззаси икәнликини ейтти.