әрдоған мусапирлар мәсилисини мәнбәсидә турғузуп һәл қилишниң зөрүрлүкини оттуриға қойди

түркийә авази радийоси хәвири: түркийә җумһурийити җумһур рәиси рәҗәп таййип әрдоған инсанпәрвәрлик вә қошнидарчилиқ мәҗбурийитини изчил ада қилип келиватқан түркийәниң, панаһлиқ тилигүчиләрниң вәтинигә бихәтәр, ихтийари вә иззәт – абройи қоғдалған һалда қайтишиға капаләтлик қилишни қоллайдиғанлиқини вә буниң үчүн зөрүр түрләрни йолға қойғанлиқини билдүрди.

дунйаниң охшимиған җайлирида кишиләрниң террорлуқ, тоқунуш, ички уруш, ачарчилиқ вә қурғақчилиқ қатарлиқ сәвәбләр түпәйлидин көчүшкә мәҗбур болуп қалғанлиқини тәкитлигән әрдоған телеграммисида: «бизниң тәртипсиз көчмәнлик вә мусапирлар мәсилисидики мәйданимиз, дөлитимизниң бихәтәрлики билән бирликтә, инсанларниң һайати вә иззәт- һөрмитини қоғдаштур. әсирләрдин буйан һечқандақ айримчилиқ қилмастин, зулумдин — зийанкәшликтин қачқанларни бағриға бесип кәлгән миллитимиз, у виҗданий позитсийәни сүрийәдин украинағичә болған районимиздики кризислар алдида йәнә бир қетим намайан қилди. түркийә инсанпәрвәрлик вә қошнидарчилиқ мәҗбурийитини изчил ада қилип, панаһлиқ тилигүчиләрниң вәтинигә бихәтәр, ихтийари вә иззәт – абройи қоғдалған һалда қайтишиға капаләтлик қилишни қоллайду вә буниң үчүн зөрүр түрләрни йолға қойиду» дегән ибариләргә орун бәрди.

ғәрб дөләтлиридә йилтиз тартқандин кейин зәһәрлик сериқ отқа охшаш башқа җәмийәтләргиму тарқалған мусапирларға өчмәнлик қилиш хаһишини, йеңи натсистларчә идийәни, мусулманлар билән чәт әлликләргә өчмәнлик қилишни рәт қилидиғанлиқини тәкитлигән әрдоған: «биз өзиниң ирқи, култури вә әқидиси сиртидики барлиқ кишиләрни инсан һесаблимайдиған бу кесәл еқимларни инсанийәтниң ортақ кәлгүсигә тәһдит дәп қараймиз» дегәнләрни қәйт қилди.

тарихтин буйан мәдәнийәтләрниң бөшүки болуп кәлгән ақ деңизниң йеқинқи йиллардин буйан ғайәт зор мусапирлар қәбристанлиқиға айлинишида йилтизи мустәмликичиликкә тутишидиған тәкәббур роһий һаләтниң наһайити күчлүк тәсири барлиқини тилға алған әрдоған: «өткән һәптә әгә деңизида йүз берип, көпинчиси балилардин тәркиб тапқан йүзләрчә кишиниң өлүмини кәлтүрүп чиқарған инсанлиқ тирагедийәси, буниң әң йеңи вә номус қиларлиқ мисалини тәшкил қилди» деди.

әрдоған хәлқара җәмийәтниң, болупму өзидин башқа һәммә адәмгә кишилик һоқуқ вә демократийә савиқи беридиған дөләтләрниң әмди болсиму мәсулийәтни үстигә елиши керәкликини оттуриға қойди.

җумһур рәис әрдоған мусапирлар мәсилисиниң кишиләрниң көчүшкә, йурт – маканлиридин айрилип қелишини кәлтүрүп чиқарған амилларни мәнбәсидә турғузуп йоқитиш арқилиқла һәл болидиғанлиқини сөзлиригә илавә қилди.