әрдоған һәрқайси дөләт рәһбәрлириниң шәрипигә берилгән зийапәттә муһим сөз қилди

түркийә авази радйоси хәвири: җумһур рәис рәҗәп таййип әрдоған, «йеңи дәврдин түркийәгә нисбәтән әң йахши пайдилиниш арқилиқ, дөлитимизниң районлуқ күч вә хәлқаралиқ актийор болуш салаһийитини мустәһкәмләймиз. техиму адил вә тинч тәртип орнитиш үчүн барлиқ алақидар тәрәпләр вә шериклиримиз билән давамлиқ һәмкарлишимиз» деди.

әрдоған мурасимиға қатнашқанларға рәхмәт ейтип, «вәзипә башлаш мурасимимизға қатнашқанлиқиңларға йәнә бир қетим рәхмәт ейтимән. гәрчә бүгүн аримизға қетилалмиған болсиму, телефон арқилиқ тәбриклирини йәткүзгән вә учур әвәткән барлиқ достлиримизға миннәтдарлиқимни билдүримән» деди.

җумһур рәис әрдоған милләт болуш сүпити билән қатнашқучиларниң қәдиршунаслиқини һәргиз унтулмайдиғанлиқини тилға елип, «ортақ мәнпәәтимиз асасида тәң пайда елиш чүшәнчиси билән  һәр саһәдики һәмкарлиқимизни тәрәққий қилдурушни давамлаштуримиз. бүгүнгә қәдәр пиринсипал вә қәтий ирадилик позитсийә билән мәйдан вә үстәлдә күчлүк, тәшәббускар вә инсанпәрвәрлик дипломатийәсини йолға қойуп кәлдуқ. ташқи сийасәт вә бихәтәрлик мәсилилирини тинч усул билән бир тәрәп қилдуқ. дипломатик торимизни кеңәйтиш арқилиқ дөлитимизни үнүмлүк бир хәлқара дипломатийә күчигә айландурдуқ» деди.

җумһурийәтниң 100 - йиллиқи һарписида йеңи бир дәвргә шаһит болуватқанлиқини әскәрткән әрдоған йәнә мундақ деди:

«дунйа системиси кризисләр билән қоршалған бүгүнки дунйада, бизниң асаслиқ нишанимиз 21-әсирни тинчлиқ, гүллиниш вә муқимлиқ әсри қилип қуруп чиқиштур. дийалог вә дипломатийәни алдинқи орунға қойған хушпииллиқ, виҗдан вә мөтидиллиқ асасидики позитсийә билән районимизда вә униң сиртида муқимлиқ орнитиш үчүн тиришимиз. русийә-украина кризисиға тутқан позитсийәмиз буниң әң муһим үлгиси болди. ашлиқ келишими билән йәр шари характерлиқ бир ашлиқ  кризисиниң алдини алдуқ.  йеңи дәврдин түркийәгә нисбәтән әң йахши пайдилиниш арқилиқ, дөлитимизниң районлуқ күч вә хәлқаралиқ актийор болуш салаһийитини мустәһкәмләймиз. техиму адил вә тинч тәртип орнитиш үчүн барлиқ алақидар тәрәпләр вә шериклиримиз билән давамлиқ һәмкарлишимиз. бизниң йөнилишимиз һәм ғәрб тәрәпкә һәм шәрқ тәрәпкә болиду әмма асаслиқ йөнилишимиз тоғра, һәқиқәт вә адаләт тәрәптә болиду»

җумһур рәис әрдоған кәчлик зийапәттә, шималий атлантик әһди тәшкилати баш катипи җенс столтенберг, әрменийә баш министири никол пашинйан вә түрк әрменийә патриги саһак машалйан билән сөһбәтләшти.