ئاقار: تېررورىزمغا قارشى كۈرەش ئاخىرلاشقاندا خەلقنىڭ پاراۋانلىقى تېخىمۇ ئاشىدۇ

تۈركىيە ئاۋازى رادىيوسى خەۋىرى: دۆلەت مۇداپىئە مىنىستىرى خۇلۇسى ئاقار تۈنۈگۈن (23-ماي) پايتەخت ئەنقەرەدە بەرگەن باياناتىدا، تېررورىزمغا قارشى كۈرەشتە ناھايىتى زور مۇۋەپپەقىيەتلەرنىڭ قولغا كەلتۈرۈلۈۋاتقانلىقىنى، بۇ كۈرەش ئاخىرلاشقان ۋە تېررورچىلار پۈتۈنلەي يوقىتىلغان چاغدا خەلقنىڭ پاراۋانلىقىنىڭ تېخىمۇ ئاشىدىغانلىقىنى تەكىتلەپ مۇنداق دېدى: «بۇنىڭ ئەڭ روشەن مىسالى <گابار تېغى> دۇر. ئىلگىرى <گابار تېغى> تېررورچىلارنىڭ ئۇۋىسى ئىدى، ئەمدىلىكتە بولسا نېفىت مەنبەسىگە ئايلاندى. بۇ ھەقتە ئىزچىل خىزمەت ئىشلەۋاتىمىز، بۇ خىزمىتىمىزنىڭ دائىرىسىنى تېخىمۇ كېڭەيتىپ، <گابار تېغى> نى تەرەققىي قىلدۇرىمىز.»

مىنىستىر ئاقار تېررورىزمغا قارشى كۈرەشنىڭ قەتئىي ئىرادە بىلەن كەسكىن داۋاملىشىۋاتقانلىقىنى، بۇ دائىرىدە،  2015-يىلى 7-ئاينىڭ 24-كۈنىدىن بۇيان  37 مىڭ 886 تېررورچىنىڭ بىر تەرەپ قىلىنغانلىقىنى، ئالدىنقى ئايدا بىر تەرەپ قىلىنغان تېررورچىلار سانىنىڭ 126 گە يەتكەنلىكىنى ئېيتتى.

ئاقار تېررورچىلار ئۈزۈل – كېسىل يوقىتىلغانغا قەدەر تېررورىزمغا قارشى كۈرەشنىڭ ئۈزلۈكسىز داۋاملىشىدىغانلىقىنى، چېگرا رايونلىرىنىڭ تۈركىيە جۇمھۇرىيىتى تارىخىدىن بۇيانقى ئەڭ كەسكىن تەدبىرلەر ئارقىلىق قوغدىلىۋاتقانلىقىنى، يېقىنقى بەش يىل ئىچىدە چېگرا ئېغىزلىرىدىن قانۇنسىز ھالدا ئۆتۈشكە ئۇرۇنغان 3 مىليون 300 مىڭ كىشىنىڭ توسۇپ قېلىنغانلىقىنى قەيت قىلدى.