чавушоғлу: б д т қатарлиқ хәлқаралиқ тәшкилатлар ислаһатқа моһтаҗ

түркийә авази радийоси хәвири: һиндистанниң пайтәхти деңи деһлида чақирилған 20 дөләт гуруһи ташқи ишлар министирлири йиғини 6 – феврал (2023) түркийәниң қаһраманмарашни мәркәз қилған 11 вилайити вә сүрийәдә йүз бәргән йәр тәврәштә җенидин айрилғанлар үчүн һөрмәттә туруш билән башланди.

ташқи ишлар министири мәвлүт чавушоғлу йиғинда қилған сөзидә, түркийәдики йәр тәврәш апитидә һәмкарлиқ асасида һәрикәт қилғанлиқи үчүн хәлқара җәмийәткә миннәтдарлиқ билдүрди.

чавушоғлу «көп тәрәплик һәмкарлиқни күчәйтиш, ислаһат еһтийаҗи, йемәклик вә енергийә бихәтәрлики, тәрәққийат һәмкарлиқи» темилиқ йиғинда, түркийәниң бу позитсийәсиниң « көп тәрәплик һәмкарлиқни күчәйтиш вә ислаһат елип беришқа болған еһтийаҗ» ниң тәқәззаси икәнликини тәкитлиди.

ташқи ишлар министири мәвлүт чавушоғлу бирләшкән дөләтләр тәшкилати ислаһат қилинмиса, көп тәрәплик тиришчанлиқниң йетәрлик болмайдиғанлиқини әскәртти, һәмдә хәвпсизлик кеңиши, дунйа сәһийә тәшкилати қатарлиқ бирләшкән дөләтләр тәшкилати органлиридин башқа, дунйа сода тәшкилати вә хәлқара пул-муамилә аппаратлириниңму кәң даирилик ислаһатқа моһтаҗ икәнликини қәйт қилди.

чавушоғлу мундақ дәп көрсәтти: «ислаһат елип бериш тиришчанлиқлири бизниң шәхсий мөлчәрлиримизгә әмәс, бәлки техиму чоң йахшилиқ мәнзилгаһлириға елип баридиған нишанларға асаслиниши керәк.»

министир чавушоғлу украинадики урушниң дунйа енергийә вә йемәклик бихәтәрлики мәсилисини оттуриға чиқарғанлиқини,  йемәклик вә енергийә бихәтәрлики болмиса һәр қандақ шәкилдики тәрәққийат тиришчанлиқини тәсәввур қилғили болмайдиғанлиқини тәкитлиди.

чавушоғлу сөзини давамлаштуруп мундақ деди: «бирләшкән дөләтләр тәшкилати билән биз биваситә рол ойниған истанбул ашлиқ келишими арқилиқ дунйадики һәр бир аилигә йардәм берилмәктә. шуңа, бу келишимниң муддитини узартишқа тиришиватимиз.»