ئەردوغان دىيارباكىردىكى ئاپەت رايونىنى تەكشۈردى

تۈركىيە ئاۋازى رادىيوسى خەۋىرى: جۇمھۇر رەئىس ئەردوغان دىيارباكىردىكى چېدىر شەھەردە بايانات بەردى؛ «بىز (6 – فېۋرال) يەكشەنبە كۈنى باشتىن كەچۈرگەن 7.7، ئارقىدىن يۈز بەرگەن 7.6 بال يەر تەۋرەشلەر، دۆلىتىمىزنىڭ تارىخىدىكى ئەڭ چوڭ پاجىئە بولغان 1999 – يىلىدىكى يەر تەۋرەشتىن ئۈچ ھەسسە شىددەتلىك، ئۈچ ھەسسە ۋەيران قىلغۇچ بولدى» دېگەن ئەردوغان، سۆزىنى داۋاملاشتۇرۇپ: «دۇنيانىڭ ئالدىنقى قاتاردىكى ئالىملىرىمۇ دۆلىتىمىز باشتىن كەچۈرگەن يەر تەۋرەشنىڭ چوڭلۇقى ۋە ۋەيران قىلغۇچلۇقى مەسىلىسىدە ھەمپىكىر. بۇ ئەسىرنىڭ پاجىئەسى، دەپ ئاتىلىۋاتقان بۇ يەر تەۋرەش، 1000 كىلومېتىر جايدا ھېس قىلىنغان بولۇشىغا قارىماي، 500 كىلومېتىرلىق جايغا ۋەيرانچىلىق ئېلىپ كەلدى» دېدى.

شەھەرلەرنىڭ بىر قىسمىدىكى ئىزدەش – قۇتقۇزۇش خىزمەتلىرىنىڭ ئاخىرلاشقانلىقىنى، بىر قىسمىدىكى خىزمەتلەرنىڭ تېز سۈرئەتتە داۋاملىشىۋاتقانلىقىنى تەكىتلىگەن ئەردوغان: «ئىنشائاللاھ بۇ يەردىكى خىزمەتلەرنىمۇ تېز سۈرئەتتە تۈگىتىمىز، خارابىلىك ئاستىدا مەيلى ئۆلۈك، مەيلى تىرىك بىرمۇ پۇقرايىمىزنى قويمايمىز. ئارقىدىن تېزلىك بىلەن خارابىلىكلەرنى تازىلاپ، يېڭىدىن سېلىش پائالىيىتىمىزنى باشلايمىز. يۈز مىڭلارچە تۇرالغۇنى يېڭىدىن سالىمىز، توغرىسىنى دېگەندە، يەر تەۋرەشتە ئېغىر تالاپەتكە ئۇچرىغان شەھەرلىرىمىزنى يېڭىۋاشتىن قۇرۇپ چىقىشنىڭ پىلانلىرىنى تۈزىمىز» دېگەنلەرنى قەيت قىلدى.

دۆلەتنىڭ بارلىق ئىمكانىيەتلىرىنى سەپەرۋەر قىلغانلىقلىرىنى بىلدۈرگەن جۇمھۇر رەئىس ئەردوغان: «بىز خەلقىمىزنى قىيىنچىلىقتا، يوقسۇللۇقتا، كوچىدا تاشلاپ قويمىدۇق ۋە قويمايمىز» دېگەنلەرنى سۆزلىرىگە ئىلاۋە قىلدى.