تۈركىيە بوغۇزدىكى ئاشلىق پاراخوتلىرىنىڭ قاتناش خەۋپى پەيدا قىلىۋاتقانلىقىنى بىلدۈردى

تۈركىيە ئاۋازى رادىيوسى خەۋىرى: تۈركىيەنىڭ ب د ت دا تۇرۇشلۇق دائىمىي ۋەكىلى فەرىدۇن سىنىرلىئوغلۇ ب د ت خەۋپسىزلىك كېڭىشىدە سۆز قىلىپ، قارا دېڭىز ئاشلىق كېلىشىمىنىڭ مۇۋەپپەقىيەتلىك بولغانلىقىنى، شۇڭا داۋاملاشتۇرۇش كېرەكلىكىنى ئېيتتى.

ئۇ ئاشلىق كېلىشىمى بىلەن ھازىرغىچە 9.5 مىليون توننا ئاشلىق ۋە يېمەك-ئىچمەك ئېكسپورتىنىڭ ئەمەلگە ئاشقانلىقىنى بىلدۈرۈپ، كېلىشىم نەتىجىسىدە يەنە يېمەك-ئىچمەك باھالىرىنىڭ چۈشكەنلىكىنى قەيت قىلدى.

ئۇ كېلىشىمگە ئاساسەن، ب د ت دۇنيا يېمەك-ئىچمەك پىروگراممىسىنىڭ بەزى دۆلەتلەرگە ئاچارچىلىق باشلىنىشتىن ئىلگىرى ياردەم قىلالىغانلىقىنى، ئافغانىستاندىن ئېفىيوپىيەگىچە، سومالىدىن يەمەنگىچە بولغان دۇنيانىڭ ھەر قايسى جايلىرىدىكى بالىلارغا قارا دېڭىز ئاشلىق كېلىشىمىنىڭ پايدىسى بولغانلىقىنى بىلدۈردى.

ئۇ: «تۈنۈگۈندىن  (31-ئۆكتەبىر) باشلاپ ھېسابلىغاندا، ئىستانبۇل ئەتراپىدا تەكشۈرۈشنى كۈتۈپ تۇرۇۋاتقان ئاشلىق بېسىلغان 97 پاراخوت بار. ئىستانبۇل بوغۇزىدا لەڭگەر تاشلىغان پاراخوتلار قاتناش خەۋپى پەيدا قىلىۋاتىدۇ. تۈركىيە پاراخوتلارنىڭ يولغا چىقىشى ئۈچۈن ب د ت بىلەن بىرلىكتە تىرىشچانلىق كۆرسىتىۋاتىدۇ» دېدى.