әрдоған билән тоқайев қошма байаннамә елан қилди
дөлитимиз (түркийә җумһурийити) җумһур рәиси рәҗәп таййип әрдоған билән қазақистан пирезиденти қасим җөмәрт тоқайев, икки тәрәп оттурисида дипломатик мунасивәт орнитилғанлиқиниң 30 – йиллиқи мунасивити билән қошма байаннамә елан қилди.
түркийә авази радийоси хәвири: қазақистанниң пайтәхти астанадики акорда пирезидент сарийида, җумһур рәис рәҗәп таййип әрдоған билән қазақистан пирезиденти қасим җөмәрт тоқайевниң рийасәтчиликидә түнүгүн ишқа ашурулған учришиштин кейин, түркийә – қазақистан оттурисида дипломатик мунасивәт орнитилғанлиқиниң 30 – йиллиқи мунасивити билән қошма байаннамә елан қилинди.
16 маддин тәшкил тапқан қошма байаннамәдә, икки дөләт оттурисида көплигән саһәләрдә ортақ паалийәтләрниң көпәйтилидиғанлиқи қәйт қилинди.
қатнаш саһәсидә транс – һазар йоли вә баку – тифлис – қарс линийәсидин үнүмлүк пайдилиниш үчүн мас қәдәмдики хизмәтләрниң көпәйтилидиғанлиқи тәкитләнгән байаннамәдә, терроризмға қарши күрәш тоғрилиқму мәхсус орун аҗритилип мундақ дейилди: «икки дөләтниң дөләт бихәтәрликигә тәһдит салидиған барлиқ унсурларға қарши күрәшни күчәйтиш тоғрулуқ бирдәклик һасил қилинди.»
байаннамәдә, дөләт мудапиә санаити, маарип, муһит асраш вә орманчилиқ қатарлиқ саһәләрдә һәмкарлишиш имканийәтлирини ашуруш тоғрисида келишим һасил қилинғанлиқи вә хәлқара тәшкилатларда өзара һәмкарлиқниң давамлишидиғанлиқи оттуриға қойулди.
مۇناسىۋەتلىك خەۋەرلەر
ирақниң шималида террорчиларға зәрбә берилди
ирақниң шималида бөлгүнчи террорлуқ тәшкилати — п к к әзаси үч террорчи бир тәрәп қилинди.
