ибраһим калин америка дөләт хәвпсизлик мәслиһәтчиси билән көрүшти

түркийә авази радийоси хәвири: түркийә җумһур рәислик мәһкимисиниң байанатчиси ибраһим калин америка дөләт хәвпсизлик мәслиһәтчиси җәк сулливан (JakeSullivan) билән истанбулда көрүшти.көрүшүштә, түркийә билән американиң сийасий вә иқтисадий мунасивәтлири, мудапиә санаитидики һәмкарлиқ саһәлири, русийәниң 24-феврал (2022) таҗавузчилиқ уруши башлиған украинаниң нөвәттики әһвали, шиветсийә билән финландийәниң натоға әза болуш мусапилири, әгә деңизи вә ақдеңиз билән җәнубий кавказниң нөвәттики әһвали қатарлиқ район мәсилилири музакирә қилинди.

икки дөләт оттурисида истратегийәлик механизмниң әмәлгә ашурулуши билән бирликтә, ортақ мәнпәәтләр асасида һәмкарлиқ саһәлирини ашуруш үмидлири тилға елинди.

түркийәниң «F-16» тәлипигә мунасивәтлик басқучларниң ахирлишишиниң икки дөләтниң истратегийәлик мәнпәәтлири үчүн хизмәт қилидиғанлиқи әскәртилди.

түркийәниң натодики һалқилиқ роли тәкитләнгән көрүшүштә, иттипақдашларниң ортақ бихәтәрлик хәвпигә вә барлиқ террорлуқ тәһдитлиригә қарши өзара маслишип вә иттипақлишип һәрикәт қилиш керәклики тәкитләнди.

әгә деңизи вә ақдеңиз мәсилилиридә түркийәниң һоқуқ-мәнпәәтини қоғдашта иккиләнмәйдиғанлиқи тәкитлиниш билән биргә, гиретсийәниң таҗавузчилиқ вә қанунсиз һәрикәтлирини қобул қилғили болмайдиғанлиқи оттуриға қойулди.

дунйа бихәтәрлики вә муқимлиқиға тәһдит селиватқан украинадики урушни ахирлаштуруш үчүн хәлқара қанун асасида дипломатик тиришчанлиқларға әһмийәт беришниң муһимлиқи көрситилди.