әрдоған ирандин қайтиш сәпиридә муһим байанатларни елан қилди
түркийә җумһур рәиси рәҗәп таййип әрдоған америка пирезиденти җо байдинниң түркийәгә «F-16» күрәшчи айропилани сетип бериштә гиретсийә шәртини оттуриға қоймиғанлиқини билдүрди.
1857419
түркийә авази радийоси хәвири:җумһур рәис рәҗәп таййип әрдоған түнүгүн (19-ийул) иран зийаритини ахирлаштуруп мәмликәткә қайтиш сәпиридә, айропиланда мухбирларниң күнтәртипкә мунасивәтлик соаллириға җаваб бәрди.
у американиң түркийәгә «F-16» айропилани сетип бериши үстидә тохтилип: «биз һөрмәтлик байдин билән мәзкур мәсилини музакирәләшкәндә, бизгә гиретсийә шәртини қоймиди. дәл әксичә, узунға созулған учришишимизда, <биз натоға әза дөләтләр болуш сүпитимиз билән, бир-биримизниң һәқ-һоқуқини қоғдишимиз керәк дәп сөһбәтләштуқ>» деди.
у америка пирезиденти байдинниң «F-16» мәсилисидә қолидин келишичә тиришчанлиқ қилидиғанлиқини әскәртип: «наһайити әпсуски һазир америка авам палатасида сани аз болсиму бу ишқа қарши чиқиватқанлар бар. һазирқи вәзийәткә қариған вақтимизда, әслидә бундақ шәрт қойуш мәсилиси бизни чәклийәлмәйду. улар <F-16> ларни сетип беришкә мунасивәтлик тәклипимизгә мақул десила купайә. бизгә йеңи <F-16> ларни сетип бәрсила болди. қолимиздики <F-16> ларни асираш ишлирини қилалайдиған иқтидаримиз бар» деди.
у сүрийә мәсилиси үстидә тохталғанда, американиң фират дәрйасиниң шәрқидин чиқип кетиши керәкликини тәкитлиди.
у йеңи һәрбий һәрикәт тоғрисида: «миллий хәвпсизлик әндишәлиримиз түгимигән әһвалда һәрбий һәрикәт давамлиқ күнтәртипимиздә болиду» деди.
у мундақ деди:
«сүрийә чеграсидин 30 километир җәнубқичә болған террорлуқ тәшкилатлириға қарши күришимиздә, иран билән русийәдин бизни қоллишини тәләп қилимиз. улар бизни қоллиши керәк.»
у ахирида, йеқинқи күнләрдә бөлгүнчи террорлуқ тәшкилати п к к|й п г террористлириниң шималий сүрийәдә бәшшар әсәд һакимийитиниң байриқини асқанлиқиға қаритип мундақ деди:
«бәшшар әсәд һакимийитиниң байриқини у йәрдә ләпилидитип, түркийә армийәсини алдийалаймиз дәп хийал қиливатиду, армийәмиз буниңға алданмайду.»