türkiye bilen erméniye biwasite awiyatsiye yük sodisini bashlash toghrisida kélishti

türkiye awazi radiyosi xewiri: türkiye jumhuriyiti tashqi ishlar ministirliqi, türkiye – erméniye munasiwetlirini normallashturush musapisi alahide wekilliri bash elchi serdar qilich bilen erméniye parlaménti muawin bashliqi rubén rubinyanning uchrishishi heqqide yazma bayanat élan qildi.

qilich bilen rubinyanning tötinchi qétimliq uchrishishining tünügün awstriyening paytexti wiyénnada ötküzülgenlikige isharet qilinghan bayanatta, «terepler, türkiye bilen erméniye otturisidiki quruqluq chégrasini ikki döletni ziyaret qilidighan üchinchi dölet puqralirining ötüshi üchün eng qisqa waqit ichide échiwétish toghrisida chüshinish hasil qilip, buninggha alaqidar xizmetlerni bashlashqa qarar qildi» dégen ibarilerge orun bérildi.

bayanatta yene, «buningdin bashqa, ular türkiye bilen erméniye otturisida biwasite awiyatsiye yük sodisini pat yéqinda bashlash toghrisida kélishti we teyyarliq xizmetlirige tutush qilishqa qarar qildi» déyildi.

yene bir tereptin uchrishishta, söhbetning hel qilghuch meqsiti bolghan ikki dölet munasiwitini «toluq normallashturushqa kapaletlik qilish» yolida tashlashqa bolidighan bashqa konkrét qedemlerningmu muzakire qilinghanliqi, tereplerning munasiwetlerni normallashturush xizmetlirini aldinqi shertsiz dawamlashturush toghrisidiki iradisini tekitlep ötkenliki eskertildi.