erdoghan shiwétsiyening 73 térrorchini qayturup béridighanliqini bildürdi

türkiye awazi radiyosi: jumhur reis erdoghan shimaliy atlantik ehdi teshkilati — nato dölet we hökümet bashliqliri yighinidin kéyin muxbirlarning soallirigha jawab bérish jeryanida, shiwitsiyening 73 qachqun térorchini türkiyege tapshurup bérishke wede bergenlikini eskertip: «shiwétsiye 73 térrorchini bizge qayturup béridu. nöwette ularning üch - tötini ewetti, emma bular biz üchün yéterlik emes. elwette bularni edliye ministirliqimiz, tashqi ishlar ministirliqimiz we milliy istixbarat teshkilatimiz yéqindin közitip, bularni qayturup bérishni telep qilidu. bular kelse yaxshi, eger kelmise, qilishqa tégishlik ishlarni her waqit munasiwetlik idare – organlirimiz arqiliq qilishni dawamlashturimiz» dédi.

«buningdin kéyin, p k k we fethullahchi térrorluq teshkilati ezalirining térrorluq teshwiqati qilishi, dölitimiz we puqralirimizgha hujum qilishi, qalaymiqanchiliq sélishi téximu qiyinlishidu» dégen erdoghan, sözini dawamlashturup: «buningdin kéyinki jeryan shiwétsiye bilen finlandiyege baghliq. ularda herqandaq bir xataliq körülse, qolimizda polattek pakitlirimiz bar, tégishlik qedemlerni tashlaymiz» dégenlerni qeyt qildi.

erdoghan bashliqlar yighini dairiside ötküzülgen uchrishishlarda, p k k / p y d / y p g , fetö qatarliq térrorluq teshkilatlirining natoning yazma matériyalliri qataridin orun alghanliqini tilgha élip: «bu ishning yazma xatirilerge élinishi tunji qétimliq ish. bashqiche éytqanda, p k k ning ismi yawropa ittipaqi höjjetliride bar idi, emma p y d/y p g we fetöning ismi yoq idi» dédi.

yene bir tereptin, jumhur reis erdoghan, amérika qoshma ishtatliri pirézidénti jo baydin bilen ötküzgen uchrishishi jeryanida, süriyediki térrorchilargha yük mashnilirigha yüklep ewetilgen qorallarning küntertipke kelgen - kelmigenliki toghrisidiki bir soalgha jawab bérip, «elwette otturigha qoydum. (amérikaning sabiq pirézidénti donald) tramp dewridin bashlap tilgha élip, <nechche ming yük mashinisi qoral, üsküne, oq – dora bu yerge élip kélindi>. biz hazir bu yerde térrorizm toghrisida söhbet élip barimiz. emma türkiyeni hujum nishani qilip békitken térrorchilargha qoral, oq – dora, mashina we her xil üsküniler bu shekilde bériliwatqan ehwalda, biz natodiki shérikler qandaqmu ittipaqlishalaymiz?» dédi.

u, nato bashliqlar yighinida barliq rehberlerning «wasitichi bolayli, (türkiyeni) girétsiye bilen bir yerge jem qilayli» dégen qarashni otturigha qoyghanliqini bildürüp, biz «eyibke buyrumanglar, hazirche bu ishqa ajritidighan waqtimiz yoq déduq» dédi.