chawushoghlu: türkiye bilen iranning térrorluqqa qarshi küreshte hemkarlishishi intayin muhim

türkiye awazi radiyosi xewiri: türkiye tashqi ishlar ministiri mewlüt chawushoghlu tünügün (2022-yili 27-iyun) iran tashqi ishlar ministiri hüseyin emir abdullahiyan bilen tashqi ishlar ministirliqida ötküzülgen uchrishishtin kéyin, birlikte axbarat élan qilish yighini ötküzdi.

u tashqi ishlar ministiri abdullahiyan bilen türkiye we iran otturisidiki ikki terep munasiwetlirini barliq terepliri bilen muzakire qilghanliqlirini bildürüp, oxshimighan sahelerde birlikte heriket qilish we hemkarliqni qandaq tereqqiy qildurush mumkinchilikini söhbetleshkenliklirini qeyt qildi.

u ikki dölet arisidiki soda omumiy sommisini téximu ashurush؛ buning üchün qoldiki méxanizmlardin yaxshi paydilinish kéreklikini eskertip: «bu meqset bilen, 29-qétimliq arilashma iqtisadiy komitét yighinini qisqa waqit ichide échishni teklip qilimiz» dédi.

u irangha yürgüzülüwatqan émbargolar üstide toxtilip: «biz her qachan irangha yürgüzülüwatqan bir tereplimilik émbargolargha qarshi chiqtuq, biz bu émbargolarni toghra dep qarimaymiz. yadro kélishimini qaytidin aktip halgha keltürüsh üchün barliq tereplerning zörür qedemlerni tashlishini ümid qilimiz. kélishim hasil qilnghan teqdirde, rayonimizgha we ikki terepning iqtisadiy munasiwetlirige ijabiy tesir körsitidu, shundaqla sodimizni ümid qilinghan sewiyege chiqirishqa köp hesse qoshidu» dédi.

u térrorluqqa qarshi küreshte, türkiye bilen iran otturisidiki hemkarliq üstide toxtilip: «ikki qoshna dölet bolush süpitimiz bilen, térrorluqqa qarshi küreshte özara hemkarlishishimiz intayin muhim. biz bügün bixeterlik hemkarliqigha oxshash mesililernimu közdin kechürduq, konkrét teleplirimizni özara ortaqlashtuq. buningda dawamliq tirishchanliq körsitishimiz kérek. chünki térrorluq hemmimizning ortaq düshmini» dédi.

u yene, türkiye-iran munasiwetliridin bashqa, ukraina urushi, iraq we afghanistanning nöwettiki weziyiti, süriye we yemenni öz ichige alghan rayon mesililiriningmu muzakire qilinghanliqini qeyt qildi.

uchrishishtin kéyin, türkiye jumhur reisi rejep tayyip erdoghan iran tashqi ishlar ministiri hüseyin emir abdullahiyanni huzurida qobul qildi.

jumhur reislik mehkimisidiki uchrishish axbaratqa yépiq shekilde ötküzüldi. mewlüt chawushoghlu uchrishishta birge boldi.