enqere yawropa ittipaqigha qattiq naraziliq bildürdi

türkiye yawropa ittipaqi bashliqlar yighinida chiqirilghan türkiyege munasiwetlik qararlargha qattiq naraziliq bildürdi.

1848043
enqere yawropa ittipaqigha qattiq naraziliq bildürdi

türkiye awazi radiyosi xewiri: türkiye jumhuriyiti tashqi ishlar ministirliqi, yawropa ittipaqigha eza döletlerning dölet we hökümet bashliqlirining 23-, 24-iyun künliri bélgiyening paytexti biryussélda chaqirilghan yighinida maqullanghan türkiyege munasiwetlik qararlar heqqide yazma bayanat élan qilip: «yawropa ittipaqi dölet we hökümet bashliqliri yighinida maqullanghan qararlarda dölitimizge qarita bir tereplime, yiraqni körerlik we emeliyettin yiraq pozitsiyening namayen qilinishi kishini epsuslanduridu. bu yawropa ittipaqining yene bir qétim türkiye mesiliside ayighi chiqmas chembirektin qutulalmighanliqining ispatidur» dégenlerni qeyt qildi.

yawropa ittipaqining girétsiyening qanunsiz heriketliri, jümlidin 10 ingliz mililiq hawa boshluqi telep qilishi, arallarni qorallandurushi we köchmenlerni qayturuwétish qatarliq qilmishlirigha süküt qilishining heyran qalarliq ish ikenliki tekitlengen bayanatta: «yawropa ittipaqi sherqiy aqdéngiz we ege déngizigha munasiwetlik xelqara qanungha xilap heddidin ashqan teleplerni qanunlashturushqa urunushini qobul qilghili bolmaydu. bu qararlar mesililerni hel qilishqa töhpe qoshmaydu, shundaqla rayonning muqimliqigha ziyan yetküzidu... gerche türkiye xelqara qanun we yaxshi qoshnidarchiliq munasiwitini yaqlash meydanini izchil saqlap kelgen bolsimu, dölitimizning bu xil pozitsiyesige qesten jiddiychilik we sürkilish peyda qilish istratégiyesi arqiliq jawab qayturulushi pütünley semimiyetsizlik misalidur» dégen ibarilerge orun bérildi.

bayanatta yene: «yawropa ittipaqi emdilikte bolsimu, türkiyening ezaliq musapisi we dölitimiz bilen bolghan hemkarliqtin érishidighan paydini girétsiye we qibris rim dairilirining tar dairilik, qanunsiz we heddidin ashqan teleplirige qurban qilmasliq kéreklikini tonup yétishi kérek. yawropa ittipaqining omumiy menpeetlirimu mahiyette shundaq qilishni telep qilidu » déyildi.

bashliqlar yighinida ukraina bilen moldawiyege kandidat dölet salahiyitining bérilishi bilen giruziyege yawropa ittipaqigha eza bolush köznikining échilishidin xushalliq hés qilinghanliqigha isharet qilinghan bayanatta, nöwette kandidat dölet salahiyitide turuwatqan albaniye we shimaliy makédoniye bilen qétilish söhbitining téxiche bashlanmighan bolushidin ghelitilik hés qilinghanliqi eskertildi.

bosniye-gértségowinaghimu kéchikmestin kandidat dölet salahiyitini bérishning balqan rayonini öz ichige alghan keng yawropa jughrapiyesige paydiliq ikenlikige isharet qilinghan bayanatta yene: «türkiye yawropa ittipaqining barliq kandidat döletler bilen semimiy munasiwet ornitishi we qoshulush jeryanlirining layaqetni asas qilip ilgirilishi kéreklikige ishinidu» dégen ibarilerge orun bérildi.


خەتكۈچ: #uyghurche , #yawropa , #türkiye

مۇناسىۋەتلىك خەۋەرلەر