chawushoghlu enqerede yair lapid bilen qoshma muxbirlarni kütüwélish yighini ötküzdi
dölitimiz (türkiye jumhuriyiti) tashqi ishlar ministiri mewlüt chawushoghlu, israiliye bilen munasiwetlerdiki diplomatik wekillik sewiyesini bash elchilik derijisige kötürüsh toghrisida kélishkenliklirini bildürdi.
türkiye awazi radiyosi xewiri: ministir mewlüt chawushoghlu paytext enqerede dölet ishliri ziyaritide bolghan israiliye tashqi ishlar ministiri yair lapid bilen körüshkendin kéyin qoshma muxbirlarni kütüwélish yighini ötküzdi.
lapidning ziyaritining türkiye-israiliye munasiwitini téximu tereqqiy qilduridighanliqigha ishinidighanliqini bildürgen chawushoghlu, ikki dölet otturisidiki diplomatik wekillik sewiyesini bash elchilik derijisige kötürüsh üchün teyyarliq qiliniwatqanliqini éytti.
chawushoghlu israiliyeliklerge qaritilghan térrorluq tehditi toghrisida bolsa, türkiyening israiliye bilen bixeterlik mesiliside hemkarlishidighanliqini bayan qilip: «biz dölitimizde bundaq weqelerning, hésablishishlarning, térrorluq hujumlirining yüz bérishige hergiz yol qoymaymiz» dédi.
u, türkiyening pelestin mesilisi heqqidiki ikki döletlik hel qilish teklipining hélihem küchke ige ikenlikini tekitlidi.
israiliye tashqi ishlar ministiri lapid, özlirining türkiye heqqide chiqirilghan sayahet agahlandurushini özgertidighanliqlirini we israiliye bash elchisining yéqin kelgüside türkiyege qaytip kélishi üchün qedem tashlighanliqlirini éytti we sözini dawamlashturup: «men güzel istanbul we yurtunglarning güzel déngiz sahillirigha heyranmen. men aldimizdiki künlerde israiliyeliklerning bu yerge qaytip kélishini, türkiye puqraliriningmu pat arida istanbuldin biwasite qatnaydighan ayropilanlar bilen quddusni ziyaret qilalaydighan bolushini ümid qilimen» dédi.
