«térrorizm we tehdit arqiliq siyaset bilen shughullinish dewri alliqachan axirlashti»
jumhur reis rejep tayyip erdoghan türkiyede térrorizm we tehdit arqiliq siyaset bilen shughullinish dewrining alliqachan axirlashqanliqini éytti.
türkiye awazi radiyosi xewiri: jumhur reis erdoghan, «démokratiye we erkinlikler arili» diki adnan menderes qurultay merkizide, 27 – may herbiy – siyasiy özgirishining 62 – yilliqi munasiwiti bilen ötküzülgen xatirilesh paaliyitide qilghan sözide, döliti hem xelqi üchün jan tikip xizmet ishlitigen siyasiyonlarning bezide herbiy – siyasiy özgirish qozghighuchilar teripidin tehdit sélinghanliqini tekitlep mundaq dédi: «xelqimiz bilen birlikte tariximizning eng chong démokratiye zeperliridin birige 15 – iyul (fethullahchi térrorluq teshkilatining herbiy – siyasiy özgirish teshebbusi) küni muweppeq bolduq.»
herbiy – siyasiy özgirishler sewebidin, türkiyening iqtisadiy tereqqiyat jehettin ornini tolduruwalghili bolmaydighan derijide éghir bedellerni töleshke mejbur bolghanliqini eskertken jumhur reis erdoghan, asasliq weyranchiliqning adalet sistémisida otturigha chiqqanliqini tekitlep mundaq dédi: «xelqning polattek iradisini héchkim zenjirliyelmeydu, héchkim bu milletning hoquqigha dexli-teruz qilalmaydu. bu millet üchün xizmet qilghanlarning qiligha héchkim chéqilalmaydu. /.../ gézit serlewhiliri bilen siyasetning yönilishini belgileydighan künler, térrorizm we tehdit arqiliq siyaset bilen shughullinish dewri alliqachan axirlashti. hemme shuni bilishi kérekki, türkiye démokratik qanun dölitidur. igilik hoquqi shertsiz milletke tewe bolghan dölettur.»
térrorizmgha qarshi küresh toghriliqmu toxtalghan jumhur reis erdoghan, iraqning shimali we süriyening shimalidiki «<tinchliq buliqi> herbiy herikiti» rayonida, türkiyening chégra liniyelirini boylap 30 kilométir chongqurluqta térrorizmgha qarshi küreshning üzlüksiz dawamlashturuluwatqanliqini we bu küreshning buningdin kéyinmu oxshash shekilde izchil dawam qilinidighanliqinimu sözlirige ilawe qildi.
