зеленский әрдоғанға тәшәккүр ейтти

түркийә авази радийоси хәвири: җумһур рәислик учур-алақә идариси әрдоғанниң украина пирезиденти зеленский билән телефонда көрүшкәнлики тоғрисида байанат елан қилди.

байанатта, икки рәһбәрниң көрүшүшидә, русийәниң аталмиш донетск вә лухансктин ибарәт икки җумһурийәтни етирап қилиш қарари музакирә қилинғанлиқи билдүрүлди.

көрүшүшниң әрдоғанниң сенегалдики зийарити җәрйанида әмәлгә ашқанлиқи әскәртилгән байанатта, донетскниң нөвәттики вәзийити вә русийә федератсийә кеңишиниң йиғинида елан қилинған қарарларниң музакирә қилинғанлиқи әскәртилди.

рәҗәп таййип әрдоған түркийәниң ташқи ишлар министирлиқи елан қилған байанат билән мәйданини намайан қилғанлиқини тәкитләп, путинниң аталмиш җумһурийәтләрни етирап қилишини қобул қилғили болмайдиғанлиқини әскәртти.

у украинаниң земин пүтүнлүкигә зийан салидиған һәр қандақ қарарға қарши икәнликлирини, мәсилиниң һәл қилиниши үчүн хәлқарада дипломатийәниң барлиқ имканийәтлиридин пайдилиниш керәкликини тәкитлиди.

украина пирезиденти зеленский твиттерда бу қетимқи көрүшүшкә мунасивәтлик учур һәмбәһирлиди.

у: «русийәниң иғвагәрчиликлиригә қарши украинани қоллиғанлиқи үчүн җумһур рәис рәҗәп таййип әрдоғанға тәшәккүр ейттим» деди.

у учурида йәнә, әрдоғанға б д т хәвпсизлик кеңиши, түркийә вә германийәниң бирләшмә йиғин ечиш тәклипини қобул қилғанлиқи үчүн тәшәккүр ейтқанлиқини билдүрди.