chawushoghlu latin amérikada ziyarette bolidu
tashqi ishlar ministiri mewlüt chawushoghlu martta bir qisim latin amérika döletliride ziyarette bolidighanliqini bildürdi.
türkiye awazi radiyosi xewiri: chawushoghlu, latin amérika döletlirining enqerede turushluq bash elchiliri we türkiye büyük millet mejlisi daostluq guruppisining reisliri bilen enqere uniwérsitétida xizmet yighini ötküzdi, hemde bu yerde qilghan sözide, latin amérika elliri bilen hemkarliqni kücheytkenlikliridin intayin xursen ikenliklirini tekitlep mundaq dédi: «mart éyida bir qisim latin amérika döletliride ziyarette bolimiz, biraziliyedin bir teklip keldi, jenubtin bashlap ottura amérikagha qeder 4 – 5 dölette ziyarette bolimiz, munasiwetlirimizni yenimu yüksek sewiyege yetküzimiz, munasiwetlirimizni téximu tereqqiy qildurush üchün kespdashlirimiz bilen, eger qobul qilghan teqdirde, dölet bashliqliri bilen muhim uchrishishlarni élip bérishni ümid qilimiz.»
latin amérika rayonidiki xelqaraliq teshkilatlar bilenmu zich hemkarliq ichide ikenliklirini eskertken chawushoghlu, ottura amérika bir gewdilishish guruppisi bilen kéler qétimliq yighinni aliy derijilik rehberler sewiyeside chaqirishni xalaydighanliqlirini qeyt qildi, türkiyening latin amérika rayonidiki wakaletxanilirining sanini 17 ge yetküzgenliklirini, latin amérika döletlirining türkiyediki elchixanilirining saniningmu 16 ge yetkenlikini, bu jehete nahayiti zor ilgirileshlerni hasil qilghanliqlirini, türkiye bilen latin amérika rayonidiki iqtisadiy munasiwetlerning yenimu yüksek sewiyege yetküzülüshi we sodining aldidiki tosalghularning pachaqlap tashlinishining zörürlükini tekitlep mundaq dédi: «latin amérika elliri bilen bolghan munasiwetlirimizni kücheytish nishanimiz, bir gewdilik rohi asasida ortaq bir kélechek üchün hemkarliqimizni kücheytishtur. derweqe, bu dairide xizmet ishlewatimiz, bu heqte tashlanghusi qedemlernimu eng küchlük shekilde qollaymiz.»
